ডিজিটেল ডেস্কঃ কেন্দ্ৰীয় অনুসন্ধান ব্যুৰো এনফোৰ্চমেণ্ট ডাইৰেক্টৰেট আকৌ এবাৰ উচ্চতম ন্যায়ালয়ৰ তীব্ৰ সমালোচনাৰ সন্মুখীন হৈছে। উচ্চতম ন্যায়ালয়ে কৈছে যে ইডিয়ে তদন্ত প্ৰক্ৰিয়াত নিৰপেক্ষতা বজাই ৰখা নাই। ন্যায়ালয়ে কয় যে তদন্তকাৰী সংস্থাটো কেতিয়াও প্ৰতিশোধপৰায়ণ হ'ব নালাগে।
শীৰ্ষ আদালতখনে স্পষ্ট কৰি দিয়ে যে ইডিৰ দ্বাৰা লোৱা প্ৰতিটো পদক্ষেপত স্বচ্ছতা থাকিব লাগে। নিৰপেক্ষতাৰ সৈতে সংস্থাটোৱে কোনো ধৰণে আপোচ কৰা উচিত নহয়।আদালতে কয় "ইডিয়ে কোনো ধৰণে প্ৰতিশোধপৰায়ণ হোৱা উচিত নহয়,"। আদালতে লগতে কয় যে কেন্দ্ৰীয় সংস্থাটোৰ অনুসন্ধান সদায় তথ্যগত হ'ব লাগে আৰু সৰ্বাধিক নিৰপেক্ষতা অৱসম্বন কৰিব লাগে।
উল্লেখ্য গুৰুগ্ৰাম স্থিত ৰিয়েল ইষ্টেট কোম্পানীএটাৰ দুজন সঞ্চালকে উচ্চতম ন্যায়ালয়ত ইডিৰ বিৰুদ্ধে গোচৰ ৰুজু কৰিছিল। ইডিয়ে এম৩এম গ্ৰুপৰ দুজন সঞ্চালক বসন্ত বনচাল আৰু পংকজ বনচালক এটা মানি লণ্ডাৰিং গোচৰৰ সন্দৰ্ভত গ্ৰেপ্তাৰ কৰিছিল। তেওঁলোকে অভিযোগ কৰিছিল যে কেন্দ্ৰীয় সংস্থাটোৱে তেওঁলোকক কোনো কাৰণ নথকাকৈ প্ৰতিশোধ পূৰাবলৈ গ্ৰেপ্তাৰ কৰিছিল। তেওঁলোকে প্ৰথমে পঞ্জাৱ আৰু হাৰিয়ানা উচ্চ ন্যায়ালয়ত গোচৰ দাখিল কৰিছিল। যেতিয়া তেওঁলোকে সেই আদালতত সমাধান বিচাৰি নাপালে, তেওঁলোকে উচ্চতম ন্যায়ালয়ৰ কাষ চাপিছিল। সেই ক্ষেত্ৰত, শীৰ্ষ ন্যায়ালয়ে লক্ষ্য কৰিছিল যে ইডিয়ে গোচৰটোত সঠিকভাৱে নিজৰ দায়িত্ব পালন কৰা নাছিল। তদন্তত অসহযোগৰ অভিযোগত বসন্ত বনচাল আৰু পংকজ বনচালক ইডিয়ে গ্ৰেপ্তাৰ কৰিছিল। উচ্চতম ন্যায়ালয়ে কয় যে তদন্তত কেৱল অসহযোগ কৰাটো গ্ৰেপ্তাৰ কৰাৰ পৰ্যাপ্ত কাৰণ হ'ব নোৱাৰে।
তাৎপৰ্যপূৰ্ণভাৱে, শেহতীয়াকৈ কেইবাবাৰো ইডিৰ ভূমিকা সম্পৰ্কে নানান ধৰণৰ চৰ্চা চলিছে। বিৰোধীয়ে বাৰে বাৰে কেন্দ্ৰীয় চৰকাৰে ইডিক ৰাজনৈতিক প্ৰতি হিংসাৰ পূৰণৰ সঁজুলি হিচাপে ব্যৱহাৰ কৰাৰ অভিযোগ উত্থাপন কৰি আহিছে। ইয়াৰ মাজতে শীৰ্ষ ন্যায়ালয়ৰ পৰ্যৱেক্ষণ যথেষ্ট গুৰুত্বপূৰ্ণ বিবেচিত হৈছে।
এক কথাত বহু নেতা, ব্যৱসায়ীৰ হৃদয়ত শেহতীয়াকৈ কঁপনি তোলা এট নাম হৈছে এনফোৰ্চমেণ্ট সঞ্চালকালয়, অৰ্থাৎ ইডি। বিৰোধীয়ে যিটো সময়ত ইডিকে ধৰি কেন্দ্ৰীয় তদন্তকাৰী সংস্থাসমূহক বিজেপিয়ে স্বাৰ্থৰ অনুকূলে ব্যৱহাৰ কৰি অহা বুলি অভিযোগ কৰিছে, তেনে সময়তে ইডিৰ কাৰ্যকুশলতাকলৈ প্ৰশ্নৰ উদ্ৰেক ঘটিছে। কেন্দ্ৰীয় সংস্থাটোৱে সময়ে সময়ে যিমান তীব্ৰতাৰে অৰ্থনৈতিক দুৰ্নীতিৰ গোচৰ সমূহত জঁপিয়াই পৰে তাৰ তুনাত সংস্থাটোৱে লাভ কৰা সাফল্যৰ হাৰ তেনেই নগন্য। এই কথা বিৰোধীয়ে কোৱা কথা নহয়। এই কথা স্পষ্ট হৈ পৰিছে সংসদত খোদ চৰকাৰেই দাখিল কৰা তথ্যৰ পৰা।
বিগত বৰ্ষত লোকসভাত এক লিখিত প্ৰশ্নৰ লিখিত উত্তৰত কেন্দ্ৰই কৈছিল যে ইডিয়ে যোৱা ১৭ বছৰত মুঠ ৫,৪২২ টা বিত্তীয় দুৰ্নীতিৰ গোচৰ ৰুজু কৰিছে। কিন্তু ইমানবোৰ গোচৰত মাত্ৰ ২৩ জন লোকক দোষী সাব্যস্ত কৰা হৈছে।
বিত্ত ৰাজ্যিক মন্ত্ৰী পংকজ চৌধুৰীয়ে কৈছিল যে যোৱা ১০ বছৰৰ ভিতৰত বিত্তীয় প্ৰৱঞ্চনা বিৰোধী আইনৰ (পিএমএলএ) অধীনত সৰ্বাধিক সংখ্যক গোচৰ ২০২০-২১ বিত্তীয় বৰ্ষতে পঞ্জীয়ন কৰা হৈছে। মন্ত্ৰীগৰাকীয়ে কৈছিল "২০২২ চনৰ ৩১ মাৰ্চলৈকে ইডিয়ে বিত্তীয় প্ৰৱঞ্চনা বিৰোধী আইনৰ অধীনত মুঠ ৫,৪২২ টা গোচৰ ৰুজু কৰিছে। প্ৰায় ১,০৪,৭০২ কোটি টকাৰ দুৰ্নীতিৰ অভিযোগ পঞ্জীয়ন কৰা হৈছে।
ইয়াৰ ভিতৰত ৯৯২ টা গোচৰত অভিযোগনামা দাখিল কৰা হৈছে আৰু ২৩ জন অভিযুক্তৰ পৰা মুঠ ৮৬৯.৩১ কোটি টকা উদ্ধাৰ কৰা হৈছে। লোকসভাত কেন্দ্ৰই দাখিল কৰা তথ্য অনুসৰি, ২০১২-১৩ বিত্তীয় বৰ্ষত পিএমএলএৰ অধীনত মুঠ ২২১ টা গোচৰ ৰুজু কৰা হৈছিল। ২০১৩-১৪ বৰ্ষত ২০৯ টা গোচৰ ৰুজু কৰা হৈছিল। ২০২০-২১ বিত্তীয় বৰ্ষত গোচৰৰ সংখ্যা আছিল ৯৮১। আৰু ২০২১-'২২ বিত্তীয় বৰ্ষত গোচৰৰ সংখ্যা ১,১৮০ লৈ বৃদ্ধি পাইছিল। ইয়াৰ লগতে, ইডিয়ে বৈদেশিক মুদ্ৰা নিয়ন্ত্ৰণ আইন (এফএমএ)ৰ অধীনত প্ৰায়৫,৫০০ বিত্তীয় দুৰ্নীতিৰ গোচৰ ৰুজু কৰিছে।
২০০২ চনত বিত্তীয় প্ৰৱঞ্চনা বিৰোধী আইন গ্ৰহণ কৰা হয়। আইনখন ২০০৫ চনত কাৰ্যকৰী হৈছিল। মুখ্যতঃ, আন্তৰ্জাতিক ড্ৰাগছ আৰু ধনৰ অবৈধ সৰবৰাহ প্ৰতিৰোধ কৰিবলৈ এই আইনখন অনা হৈছিল। আইনখন কাৰ্যকৰী হোৱাৰ পিছত কেইবাটাও সংশোধন কৰা হৈছে।
ইমানৰ পিছতো ইডিয়ে বিত্তীয় জালিয়াতিৰ হাজাৰ হাজাৰ গোচৰ ৰুজু কৰিও বছৰৰ পিছত বছৰ ধৰি মাত্ৰ ২৩ জন লোককহে দোষী সাৱস্ত্য কৰিব পৰাৰ কথাই সংস্থাটোৰ পৰিচালনা তথা কাৰ্য দক্ষতাৰ বিষয়ত সন্দেহৰ সৃষ্টি কৰা বুলি বহুতে মন্তব্য কৰিছে।
Continue Reading
