ডিজিটেল ডেস্কঃ গান্ধী পৰিয়ালৰ নহ’লেও কংগ্ৰেছৰ ভাবী সভাপতিগৰাকীয়ে গান্ধী পৰিয়ালৰ মত অমান্য কৰিব নোৱাৰিব! কংগ্ৰেছৰ সভাপতি নিৰ্বাচন সম্পন্ন হৈ যোৱাৰ পাছতে এইদৰে মন্তব্য কৰিছে দলটোৰেই এগৰাকী জ্যেষ্ঠ নেতা পি চিডাম্বৰমে।
“কোনেও কোৱা নাই যে গান্ধী পৰিয়ালৰ কণ্ঠ ৰুদ্ধ কৰা হ’ব।”- এটা টিভি চেনেলক দিয়া সাক্ষাৎকাৰত চিডাম্বৰমে এইদৰে কয়- “নতুন সভাপতিগৰাকীয়ে কংগ্ৰেছ ৱৰ্কিং কমিটি, সংসদীয় সমিতি আৰু দলৰ দৃষ্টিভংগীও শুনিব লাগিব।”
উল্লেখ্য যে কংগ্ৰেছৰ সভাপতি নিৰ্বাচনক চিডাম্বৰমে ভূয়সী প্ৰশংসা কৰিছিল। ইয়াক ২০২৪ চনৰ লোকসভা নিৰ্বাচনলৈ এক প্ৰস্তুতি বুলি অভিহিত কৰিছিল।
কংগ্ৰেছৰ নিৰ্বাচনটোক লৈ বিৰোধী পক্ষৰ ফালৰ পৰা তাচ্ছিল্য কৰা হৈ আহিছে। কোৱা হৈছে নতুন সভাপতিজনেও গান্ধী পৰিয়ালৰ ৰিম’ট কণ্ট্ৰ’লত কাম কৰিব লাগিব।
কিন্তু চিডাম্বৰমে ইয়াক নস্যাৎ কৰে। “এইটো এটা মাত্ৰ ধাৰণা।”- চিডাম্বৰমে কয়।
চিডাম্বৰমে কয় যে নতুন সভাপতিগৰাকীৰ প্ৰথম কাম হ’ব দলৰ মাজত সংহতি অনা, নিৰ্বাচনসমূহ সূচাৰুৰূপে অনুষ্ঠিত কৰা আৰু দলীয় বাহিনীসমূহ গঠন কৰা।
উল্লেখযোগ্য যে কংগ্ৰেছৰ সভাপতি নিৰ্বাচনত শশী থাৰুৰ আৰু মল্লিকাৰ্জুন খৰ্গেৰ দৰে জ্যেষ্ঠ নেতাই অংশ লৈছে। ইতিমধ্যে ভোটগ্ৰহণ সম্পন্ন হৈ গৈছে আৰু ১৯ অক্টোবৰত ইয়াৰ ফলাফল লাভ কৰা যাব।
Continue Reading
