সৌৰভ গাংগুলীক কিয় বঞ্চনা কৰা হৈছে? প্ৰধানমন্ত্ৰীলৈ লিখা পত্ৰত ক্ষোভ উজাৰিলে মমতা বেনাৰ্জীয়ে

ডিজিটেল ডেস্কঃ সৌৰভ গাংগুলীক বঞ্চিত কৰা হৈছে। অতি সোনকালে তেওঁক আইচিচিলৈ পঠাওক।– প্ৰধানমন্ত্ৰীলৈ এইদৰে এখনি পত্ৰৰ যোগেৰে নিজৰ ক্ষোভ উজাৰিলে পশ্চিম বংগৰ মুখ্যমন্ত্ৰী মমতা বেনাৰ্জীয়ে।

বেনাৰ্জীয়ে অভিযোগ কৰে যে গাংগুলীক বিচিচিআইৰ সভাপতি পদৰ পৰা অন্যায়ভাৱে বাদ দিয়া দিয়া হৈছে। ইয়াক দুখজনক বুলি তেওঁ অভিহিত কৰে।

 “তেওঁক বঞ্চনা কৰা হৈছে। কিন্তু কিয়? তেওঁৰ কি দোষ? সকলোৱে এই বিষয়ে জানে।”- মমতাই সাংবাদিকৰ আগত এইদৰে কয়- “তেওঁ (গাংগুলী) এজন জনপ্ৰিয় ব্যক্তি। সেইবাবেই তেওঁক বঞ্চনা কৰা হৈছে নেকি? মই হতচকিত হৈছো।”

“মই প্ৰধানমন্ত্ৰীক অনুৰোধ কৰো যাতে গাংগুলীক আইচিচিৰ নিৰ্বাচনত প্ৰতিদ্বন্দিতা কৰিবলৈ অনুমতি প্ৰদান কৰে।”- মমতাই কয়।

 “মই চৰকাৰক অনুৰোধ কৰো যাতে বিষয়টো ৰাজনৈতিকভাৱে নলয়।”- মমতাই কয়- “গাংগুলী কোনো ৰাজনৈতিক দলৰ সদস্য নহয়। ক্ৰিকেটৰ বাবে এটা সিদ্ধান্ত লোৱা হওক।”

উল্লেখ্য যে আইচিচিৰ চেয়াৰমেনৰ পদবীৰ নিৰ্বাচনৰ বাবে ২০ অক্টোবৰত মনোনয়ন দিব লাগিব। গাংগুলীয়ে এই নিৰ্বাচনত অংশ ল’বলৈ বিচিচিআইৰ অনুমতি লাগিব।