ডিজিটেল ডেস্কঃ মহাৰাষ্ট্ৰৰ জলগাঁও চহৰত এখন বিয়া চৰ্চাৰ কেন্দ্ৰবিন্দু হৈ পৰিছে। বিয়াখনক লৈ চৰ্চা হোৱাৰ কাৰণটো হ’ল দৰাৰ উচ্চতা ৩ ফুট আৰু কইনাৰ উচ্চতা ২.৫ফুট। এই যোৰা দেখি সকলোৰে মুখৰ পৰা মাঁথো এটাই শব্দই বাহিৰ হৈছে– 'ৰব নে বানা দি জড়ী'। দৰাৰ নাম সন্দীপ আৰু কইনাৰ নাম উজ্জ্বলা। সন্দীপৰ জীৱন উজলাবলৈয়ে যেন আগমন ঘটিল উজ্জ্বলাৰ। সন্দীপৰ কোনো ভাই-ভনী নাই। তেওঁৰ পিতৃ-মাতৃৰ উচ্চতা স্বাভাৱিক। আনহাতে উজ্জ্বলাৰ তিনিগৰাকী ভগ্নী আৰু এজন ভাতৃ আছে। মাক-দেউতাকৰ লগতে তেওঁৰ ভাতৃ-ভগ্নীৰো উচ্চতা স্বাভাৱিক। উজ্জ্বলা আৰু সন্দীপৰ পৰিয়াল দুয়োৰে বিবাহক লৈ বৰ চিন্তিত হৈ পৰিছিল। কম উচ্চতাৰ বাবে দুয়োৰে বিয়া হোৱা নাছিল।
কিন্তু কোৱা হয় যে বিবাহৰ বান্ধোন ওপৰতে নিৰ্ণয় কৰি থোৱা থাকে। সন্দীপ আৰু উজ্জ্বলাক দেখি মানুহৰ সেই বিশ্বাস যেন আৰু দৃঢ় হ’ল। সন্দীপে দ্বাদশ শ্ৰেণীলৈকে পঢ়া-শুনা কৰিছে। তেওঁ এখন সোণৰ দোকানত কাম কৰে। উজ্জ্বলাক জীৱনসংগী কৰিবলৈ পায় সন্দীপৰ হিয়া উলাহে নধৰা হৈছে। সুখে-দুখে দুয়ো একেলগে থাকিম বুলি হোমৰ জুইক সাক্ষী কৰি প্ৰতিশ্ৰুতিবদ্ধ হয়।
সন্দীপ আৰু উজ্জ্বলাৰ বিয়াখন পাতি দি অতি সুখী হৈ পৰিছে দুয়োটা পৰিয়াল। কাৰণ পৰিয়াল দুটা সদায় তেওঁলোকৰ ভৱিষ্যতক লৈ বৰ চিন্তিত আছিল। এতিয়া দুয়োৰে ঘৰখন পাতি দিবলৈ পাই সুখী হৈ পৰিছে সন্দীপ-উজ্জ্বলাৰ পৰিয়াল। পৰিয়াল দুটাই ভগৱানক অশেষ কৃতজ্ঞতা জ্ঞাপন কৰিছে। সন্দীপ-উজ্জ্বলাৰ বৈবাহিক জীৱন মধুৰ হ'বৰ বাবে গাঁওবাসীয়ে আশীৰ্বাদ আৰু শুভকামনা জ্ঞাপন কৰিছে। হৰ-গৌৰী বসতি হ'বলৈ গাঁওখনৰ বৃদ্ধসকলে দুয়োকে দিলে আশীৰ্বাদ। সকলোৰে আশীৰ্বাদ-শুভকামনা শিৰত লৈ এতিয়া যুগ্ম জীৱনৰ পাতনি মেলিবলৈ সাজু হৈছে সন্দীপ আৰু উজ্জ্বলা।
Continue Reading
