ডিজিটেল ডেস্কঃ ডাইনীৰ সন্দেহত মহাৰাষ্ট্ৰৰ এখন গাঁৱত গাওঁবাসীয়ে দুগৰাকী লোকক জীৱিত অৱস্থাতে জ্বলাই হত্যা কৰাৰ ঘটনাই প্ৰতিক্ৰিয়াৰ সৃষ্টি কৰিছে। জীৱন্তে জ্বলাই হত্যা কৰাসকলৰ ভিতৰত এগৰাকী মহিলাও আছে। আৰক্ষীয়ে প্ৰকাশ কৰা মতে মহাৰাষ্ট্ৰৰ গড়চিৰোলী জিলাত ডাইনীৰ সন্দেহত এগৰাকী মহিলাসহ দুজন লোকক আক্ৰমণ কৰি জীৱিত অৱস্থাতে জ্বলাই দিয়া হৈছে।
ঘটনাটো সন্দৰ্ভত কমেও ১৫ জন লোকক গ্ৰেপ্তাৰ কৰা হৈছে। গাওঁ খনৰ বহুতে অভিযোগ কৰিছিল যে জ্বলাই হত্যা কৰা লোক দুগৰাকী ডাইনী বিদ্যাৰ সৈতে জড়িত আছিল। গাওঁবাসীয়ে লগতে অভিযোগ কৰে যে আৰোহী বান্দু তেলামী নামৰ এটা শিশুৰ যাদু কৰাৰ ফলত মৃত্যু হৈছিল। শিশুটোৰ মৃত্যুত ক্ষুব্ধ হৈ গাওঁবাসীয়ে লোক দুজনক আবদ্ধ কৰি ৰাখিছিল।
গাওঁবাসীৰ একাংশই তেওঁলোকক আক্ৰমণ কৰিছিল আৰু তেওঁলোকৰ দেহত পেট্ৰ'ল ঢালি জ্বলাই দিছিল। এই ঘটনাত প্ৰাণহানি ঘটা লোক দুগৰাকীৰ নাম জামনি দেৱজী তেলামী (৫২) আৰু দেশু কাটিয়া আটলামী (৫৭) বুলি জানিব পৰা গৈছে। ঘটনাটোৰ গুৰুত্ব আৰু তীব্ৰতাৰ কথা বিবেচনা কৰি গড়চিৰোলীৰ আৰক্ষী অধীক্ষক নিলোৎপল আৰু ইটাপলীৰ আৰক্ষী বিষয়া চৈতন্য কদমে ইটাপলীৰ ভাৰপ্ৰাপ্ত আৰক্ষী বিষয়াক ঘটনাটোৰ তদন্ত আৰম্ভ কৰিবলৈ নিৰ্দেশ দিয়ে।আৰক্ষীয়ে তদন্ত চলাই ১৫ জন অভিযুক্তক গ্ৰেপ্তাৰ কৰিবলৈ সক্ষম হৈছে।
গ্ৰেপ্তাৰ কৰা লোকসকল ভিতৰত অজয় বাপু তেলামী, ভাউজী শত্ৰু তেলামী, অমিত সমা মাদাভি, মিৰ্চা তেলামী, বাপু কান্দ্ৰু তেলামী, সোমজী কান্দ্ৰু তেলামী, দিনেশ কলু তেলামী, শ্ৰীহৰি বিৰজা তেলামী, মধুকাৰ আদি নামৰ লোকসকল আছে। গ্ৰেপ্তাৰ কৰা লোকসকল বৰচেৱাড়া গাঁৱৰ বাসিন্দা বুলি আৰক্ষীয়ে প্ৰকাশ কৰিছে। । অভিযুক্তসকলক পাঁচ দিনৰ বাবে আৰক্ষীৰ জিম্মালৈ প্ৰেৰণ কৰা হৈছিল।
Continue Reading
