দামবৃদ্ধি: পুৱা চাহকাপৰ সৈতে খোৱা বিস্কুটখনৰ বাবে ভৰিবলৈ সাজু হওক ১০ শতাংশতকৈ অধিক ধন

ডিজিটেল ডেস্ক: পহিলা জানুৱাৰীৰ পৰাই অনলাইন খাদ্য সামগ্ৰী, কাপোৰ, জোতা ইত্যাদিত জিএছটি প্ৰযোজ্য হোৱাৰে পৰা উক্ত সামগ্ৰীসমূহৰ দাম বৃদ্ধি পাইছে৷ বছৰৰ প্ৰথমটো সপ্তাহতে পুনৰ জনতাক মাধমাৰ দিবলৈ সাজু হৈছে চৰকাৰ৷ পুনৰ দাম বাঢ়িব আপুনি ব্যৱহাৰ কৰা খাদ্য আৰু অন্য সামগ্ৰীৰ৷ দেশৰ আগশাৰীৰ ফাষ্ট-মুভিং কনজিউমাৰ গুডছ্, চমুকৈ এফএমচিজি প্ৰতিষ্ঠানসমূহে ফেব্ৰুৱাৰীৰ পৰাই সামগ্ৰীৰ দামবৃদ্ধিৰ পৰিকল্পনাৰ কথা ঘোষণা কৰিছে৷ ইয়াৰ লগে লগে আপুনি বিস্কুটখনৰ বাবে ভৰিবলগীয়া হ’ব ১০ শতাংশতকৈ অধিক ধন৷

এই সময়ছোৱাত বিস্কুটকে ধৰি আটা, বাচমতি চাউল, শ্বেম্পুৰ দাম ২ৰ পৰা ১০ শতাংশ পৰ্যন্ত বৃদ্ধি কৰা হ’ব৷ আদানী উইলমাৰ প্ৰতিষ্ঠানে পেকেজড্ আটাৰ দাম ৫ৰ পৰা ৮ শতাংশ আৰু বাচমতি চাউলৰ দাম ৮ৰ পৰা ১০ শতাংশ পৰ্যন্ত বৃদ্ধি পাব৷ দামবৃদ্ধি সম্পৰ্কত নিজৰ প্ৰতিক্ৰিয়া প্ৰকাশ কৰি ডাবৰ ইণ্ডিয়াৰ মুখ্য কাৰ্যবাহী বিষয়া মহিত মালহোত্ৰাই কয় যে প্ৰতিষ্ঠানটোৱে অলপতে ডাবৰৰ সামগ্ৰীসমূহৰ দাম ৩-৪ শতাংশ বৃদ্ধি কৰিছে৷ প্ৰতিষ্ঠানটোৱে লগতে কয়, অহা সময়ছোৱাত আন প্ৰতিষ্ঠানে গ্ৰহণ কৰা পদক্ষেপৰ লগত মুদ্ৰাস্ফীতিৰ প্ৰতি লক্ষ্য ৰাখি সামগ্ৰীৰ দামবৃদ্ধিৰ সিদ্ধান্ত গ্ৰহণ কৰা হ’ব৷

প্ৰসাধন সামগ্ৰী প্ৰস্তুতকাৰী প্ৰতিষ্ঠান কেভিন কেয়াৰেও অহা মাহৰ পৰা শ্বেম্পু আৰু ছালৰ পৰিচৰ্যাৰ সামগ্ৰীৰ মূল্য ২ৰ পৰা ৩ শতাংশ পৰ্যন্ত বৃদ্ধি কৰিব৷ সামগ্ৰীৰ ধাৰাবাহিক দামবৃদ্ধিক লৈ নীৰৱ কেন্দ্ৰীয় চৰকাৰ৷ ক’ভিডসৃষ্ট বিপৰ্যয় আৰু লকডাউনে আনি দিয়া অৰ্থনৈতিক স্থবিৰতাৰ পাছত জনসাধাৰণৰ সন্মুখত দামবৃদ্ধিৰ সমস্যাটো অতি গুৰুতৰ হৈ দেখা দিছে৷ এনেস্থলত বিস্কুট, আটা আৰু অইন প্ৰসাধন সামগ্ৰীৰ দামবৃদ্ধিয়ে যে পুনৰ জনসাধাৰণক বিপৰ্যস্ত কৰিব, সেয়া নিশ্চিত৷