হেঁপাহৰ ভোগালী বিহু উদযাপনত হেঙাৰ হ’ব নেকি অমিক্ৰন?

ডিজিটেল ডেস্কঃ ১জানুৱাৰীৰ পৰা ৰাজ্যত দ্ৰুতগতিত বৃদ্ধি পাইছে ক’ভিড আক্ৰান্তৰ সংখ্যা। ইতিমধ্যে দুজন লোক অমিক্ৰনত আক্ৰান্ত হৈছে। আক্ৰান্ত এজনক শ্বিলঙত পৰীক্ষা কৰা হৈছিল আৰু আনজন চৌদি আৰবৰ পৰা অহা ব্যক্তি।বুধবাৰে ৰাজ্যৰ ক’ভিড পৰিস্থিতি আৰু ভেকচিনেশ্যন সন্দৰ্ভত ৰাষ্ট্ৰীয় স্বাস্থ্য অভিযান কাৰ্যালয়ত স্বাস্থ্যমন্ত্ৰী কেশৱ মহন্তই সংবাদমেল সম্বোধন কৰে। ক’ভিড সন্দৰ্ভত মুখ্যমন্ত্ৰীৰ উপস্থিতিত আজিহে চূড়ান্ত সিদ্ধান্ত ল’ব।

মুখ্যমন্ত্ৰীৰ সৈতে হোৱা বৈঠকৰ পাছতহে আগন্তুক ভোগালী বিহু সন্দৰ্ভত সিদ্ধান্ত ল’ব। ২৪ ঘণ্টাত ৰাজ্যত ৫৯১জন আক্ৰান্ত হৈছে ক’ভিডত। সৰ্বাধিক কামৰূপ (মেঃ)তে ১৮০ জন নতুনকৈ আক্ৰান্ত হৈছে। বিগত দুদিনত ক্ৰমান্বয়ে মহানগৰীত ক’ভিড ৰোগীৰ সংখ্যা বৃদ্ধি পাইছে। বৰ্তমানলৈকে ৰাজ্যত ৮৫৪৯খন বিচনা সাজু কৰা হৈছে।

গুৱাহাটীৰ জিএমচিএইচত  ২০০খন, সৰুসজাইত আছে ৩০০খন বিছনা। স্বাস্থ্যমন্ত্ৰীগৰাকীয়ে লগতে কয় যে, ৰাজ্যত ফেব্ৰুৱাৰীৰ ভিতৰত সম্পূৰ্ণ কৰা হ’ব ১৫-১৮ বছৰৰ ভেকচিন প্ৰক্ৰিয়া। ইতিমধ্যে ১০ লাখ টেষ্ট কিটছ অৰ্ডাৰ দিয়া হৈছে আৰু মজুত আছে ৫ লাখ কিটছ। আজিৰ বৈঠকৰ পাছতে চৰকাৰে কি এছঅ’পি জাৰি কৰে সেয়াহে লক্ষ্যণীয় হ’ব। অমিক্ৰনে হেঙাৰ হ’ব নেকি অসমীয়াৰ বাপতিসাহোন ভোগালী বিহু উদযাপনত।

ইতিমধ্যে মুখ্যমন্ত্রীগৰাকীয়ে লকডাউনৰ কথা অস্বীকাৰ কৰিছে যদিও কিন্তু ভোগালী বিহু উদযাপন কৰোঁতে কোনোধৰণৰ ৰাজহুৱা সাংস্কৃতিক কাৰ্যসূচী অনুষ্ঠিত কৰাত বাধা আৰোপ কৰিছে।