ডিজিটেল ডেস্কঃব্ৰাজিলিয়ান তাৰকা দানি আলভেছৰ বিৰুদ্ধে এগৰাকী যুৱতীয়ে উত্থাপন কৰিছে যৌন নিৰ্যাতনৰ অভিযোগ৷ সেয়ে বছৰটোৰ আৰম্ভণিতে বিতৰ্কত সোমাই পৰিছে তাৰকাগৰাকী । তেওঁৰ বিৰুদ্ধে বাৰ্চিলোনাৰ নাইট ক্লাবত এগৰাকী যুৱতীক যৌন নিৰ্যাতন চলোৱাৰ অভিযোগ উত্থাপন হৈছে। অৱশ্যে ব্ৰাজিলৰ তাৰকা ডিফেণ্ডাৰগৰাকীয়ে এই অভিযোগ অস্বীকাৰ কৰিছে।
স্থানীয় প্ৰশাসনৰ এগৰাকী বিষয়াই প্ৰকাশ কৰা মতে ঘটনাটোৰ তদন্ত আৰম্ভ কৰা হৈছে। স্পেইনৰ এখন আগশাৰীৰ বাতৰি কাকতত ঘটনাটো সবিস্তাৰে প্ৰকাশ পাইছে। বাতৰি কাকতখনৰ মতে, বাৰ্চিলোনাৰ চাটন নামৰ নাইট ক্লাবত এই ঘটনা সংঘটিত হয়। এই নাইটক্লাবটো চেলিব্ৰিটি আৰু ধনী লোকসকলৰ আহযাহৰ বাবে সৰ্বজন বিদিত। দানি আলভেছে তাত এগৰাকী যুৱতীৰ সৈতে দুৰ্ব্যৱহাৰ কৰিছিল বুলি অভিযোগ কৰা হৈছে। যুৱতীগৰাকীয়ে দাবী কৰিছে যে দানিয়ে অনুমতি অবিহনে হঠাতে নাইটক্লাবত তেওঁক স্পৰ্শ কৰিছে।
দানিয়ে আনকি তেওঁৰ অন্তৰ্বাসত যুৱতীগৰাকীৰ হাত সুমুৱাই দিছিল বুলিও অভিযোগ কৰা হৈছে। ছোৱালীজনীয়ে ঘটনাটো তেওঁৰ বন্ধুবৰ্গৰ লগতে নাইট ক্লাবৰ নিৰাপত্তাৰক্ষীসকলক অৱগত কৰিছিল। নাইট ক্লাব কৰ্তৃপক্ষৰ পৰা তথ্য পোৱাৰ পিছত আৰক্ষী ঘটনাস্থলীত উপস্থিত হৈছিল। অৱশ্যে খবৰ পোৱা গৈছে যে দানিয়ে তাৰ আগতে সেই স্থানৰ পৰা গুচি গৈছিল।
অৱশ্যে এতিয়ালৈকে তিনিখন বিশ্বকাপ খেলা তাৰকা ডিফেণ্ডাৰগৰাকীৰ বিৰুদ্ধে আৰক্ষীৰ ওচৰত লিখিত অভিযোগ দাখিল কৰা নাই। আৰক্ষীয়ে এতিয়াও দানিক প্ৰশ্ন কৰা নাই। যুৱতীগৰাকীৰ অভিযোগ একেবাৰে সঁচা নে মিছা সেয়া জানিবলৈ আৰক্ষীয়ে তদন্ত আৰম্ভ কৰিছে।
Continue Reading
