দীপাৱলীৰ পাছত দিল্লীৰ বায়ুমণ্ডল পুনৰ বিষাক্ত, চৌদিশে ধোঁৱা, পি এম ২.৫ৰ মাত্ৰা ৪৫ শতাংশ বৃদ্ধি

ডিজিটেল ডেস্ক : ১২ নৱেম্বৰত সমগ্ৰ দেশজুৰি দীপাৱলী উৎসৱ উদযাপন কৰা হয়। উচ্চতম ন্যায়ালয়ে দিল্লীকে ধৰি সকলো স্থানতে ফটকা ফুটুৱাত নিষেধাজ্ঞা আৰোপ কৰিছিল, যাতে প্ৰদূষণ নিয়ন্ত্ৰণ কৰিব পৰা যায়। কিন্তু দীপাৱলীৰ নিশা ফটকা নিষেধাজ্ঞা উলংঘা কৰা হ’ল। ইয়াৰ পাছতেই সোমবাৰে পুৱা ঘন বিষাক্ত কুঁৱলীয়ে ছানি ধৰে দিল্লীৰ আকাশ। কুঁৱলী ইমানেই ঘন আছিল যে মাত্ৰ কেইশমিটাৰমান পাছতেই সকলো অদৃশ্য হৈ পৰিছিল। 

উল্লেখ্য যে যোৱা বছৰৰ তুলনাত হাওঁফাওঁৰ ক্ষতিসাধন আৰু ৰোগ প্ৰতিৰোধ ক্ষমতা দুৰ্বল কৰা পি এম ২.৫ কণিকাৰ মাত্ৰা ৪৫ শতাংশ বৃদ্ধি পাইছে। একে সময়তে পি এম ১০ কণিকাৰ মাত্ৰাও ৩৩ শতাংশ বৃদ্ধি পাইছে। এক প্ৰতিবেদন অনুসৰি দিল্লীৰ সকলো বায়ুৰ গুণাগুণ নিৰীক্ষণ কেন্দ্ৰই এইবেলি দীপাৱলীত প্ৰদূষণ যোৱা বছৰৰ তুলনাত অতি বেছি হোৱাত উদ্বেগ ব্যক্ত কৰে।

স্মৰ্তব্য যে দীপাৱলীৰ পূৰ্বে দিল্লী বায়ুৰ গুণাগুণ বহু পৰিমাণে উন্নত হৈছিল। দৰাচলতে দীপাৱলীৰ কেইদিনমান আগতে বৰষুণ হৈছিল যাৰ বাবে দিল্লী বায়ুৰ গুণাগুণ মাত্ৰা উন্নত হৈছিল। কিন্তু এতিয়া দীপাৱলীৰ পাছত পুনৰ বিষাক্ত হৈ পৰিছে দিল্লীৰ বায়ুমণ্ডল।