ডিজিটেল ডেস্কঃ ডেংগুত আক্ৰান্ত হৈ মৃত্যুক সাবটিলে এগৰাকী বিজেপি বিধায়িকাই। গুজৰাটৰ উনঝা সমষ্টিৰ বিজেপি বিধায়িকা আশাবেন পেটেলৰ দেহাৱসান ঘটে দেওবাৰে। ডেংগুত আক্ৰান্ত হোৱাৰ পাছতে গুৰুতৰভাৱে অসুস্থ হৈ পৰিছিল বিধায়িকাগৰাকী। ডিচেম্বৰৰ ৭ তাৰিখে জ্বৰত আক্ৰান্ত হোৱাৰ পাছতে বিধায়িকাগৰাকীৰ শৰীৰত ডেংগুৰ অৱস্থিতি ধৰা পৰে। বিধায়িকা আশাবেন পেটেলক বৃহস্পতিবাৰে আহমেদাবাদৰ জায়দুছ হাস্পতালত ভৰ্তি কৰোৱা হয়।
ডেংগুত আক্ৰান্ত হোৱাৰ ফলত প্ৰথমে আশাবেন পেটেলৰ লিভাৰ ক্ষতিগ্ৰস্ত হয় আৰু পৰৱৰ্তী সময়ত দেহৰ অন্যান্য অংগও ক্ষতিগ্ৰস্ত হয়। বিধায়িকা পেটেল দিল্লী ভ্ৰমণত গৈছিল। দিল্লীৰ পৰা উভতি অহাৰ পাছতে তেওঁৰ শৰীৰক ডেংগু ৰোগে আক্ৰমণ কৰে বুলি ধাৰণা কৰা হৈছে। গুজৰাট বিধানসভালৈ আশাবেন পেটেল প্ৰথমে কংগ্ৰেছৰ প্ৰাৰ্থী হিচাপে নিৰ্বাচিত হৈছিল যদিও পৰৱৰ্তী সময়ত তেওঁ বিজেপিত যোগদান কৰিছিল। মৃত্যুৰ সময়ত বিধায়িকাগৰাকীৰ বয়স হৈছিল ৪৪ বছৰ। আশাবেন পেটেল এই বছৰৰ এপ্ৰিল-মে মাহত কোভিড-19 মহামাৰীৰ দ্বিতীয় ঢৌৰ সময়তো সংক্ৰমিত হৈছিল। তেওঁৰ অকাল মৃত্যুত গুজৰাটৰ ৰাজনৈতিক মহলত পৰিছে গভীৰ শোকৰ ছাঁ।
আৰু পঢ়কঃ গাড়ীত সদায় ৰাখক এই ৬ টা বস্তু; সকলো বিপদ-সংকটৰ পৰা পাব সুৰক্ষা
Continue Reading
