ডিজিটেল ডেস্কঃ সমগ্ৰ দেশ জোকাৰি যোৱা মণিপুৰ কাণ্ডৰ মূল অভিযুক্তক গ্ৰেপ্তাৰ। যোৱা ৪ মে'ত মণিপুৰৰ কাংপকপি জিলাত সংঘটিত হৈছিল সমাজক লজ্জানত কৰা এক জঘন্য কাণ্ড। দলৱদ্ধ ধৰ্ষণৰ বলি হৈছিল দুগৰাকী কুকি সম্প্ৰদায়ৰ মহিলা।
বুধবাৰে পোহৰলৈ আহিছিল মণিপুৰৰ উক্ত দুগৰাকী মহিলাক উলংগ কৰি ৰাজপথেৰে পেৰেড কৰাৰ দৃশ্য। সামাজিক মাধ্যমযোগে বিয়পি পৰিছিল এই সমগ্ৰ দৃশ্য। মেইটেই সম্প্ৰদায়ৰ একাংশ লোকে সংঘটিত কৰিছিল উক্ত জঘন্য কাণ্ড।
এই ঘটনা পোহৰলৈ অহাৰ এদিন পিচতে মণিপুৰ আৰক্ষীয়ে গ্ৰেপ্তাৰ কৰে উক্ত ঘটনাৰে জড়িত মূল অভিযুক্তক। এই জঘন্য কাণ্ডৰে জড়িত মূল অভিযুক্তজনৰ নাম হিৰোদাস মেইটেই।
ৰাজ্যখনৰ মুখ্যমন্ত্ৰী এন বীৰেন সিঙে সামাজিক মাধ্যমযোগে এই কথা প্ৰকাশ কৰে।
আৰক্ষীবিষয়াসকলে জনোৱা মতে, ঘটনাৰ ভিডিঅ’ প্ৰকাশ পোৱাৰ লগে লগে কেইবাটাও আৰক্ষীৰ দল গঠন কৰা হয়। মাষ্টাৰমাইণ্ড বুলি অভিযোগ উত্থাপন কৰা লোকসকলৰ অন্যতম হিৰোদাস মেইটেইক থৌবাল জিলাৰ পৰা গ্ৰেপ্তাৰ কৰা বুলি বিষয়াসকলে জানিবলৈ দিয়ে। ২৬ ছেকেণ্ডৰ এই ক্লিপটোত অভিযুক্তজনক বিশেষভাৱে দেখা গৈছিল।
মণিপুৰৰ মুখ্যমন্ত্ৰী বীৰেণ সিঙে কয় যে ৰাজ্য চৰকাৰে অভিযুক্তক মৃত্যুদণ্ড দিয়াৰ কথা চিন্তা কৰিছে। আমি ভিডিঅ'টো দেখিলোঁ আৰু বহুত বেয়া লাগিল, ই মানৱতাৰ বিৰুদ্ধে অপৰাধ। লগে লগে আৰক্ষীক নিৰ্দেশ দিলোঁ যে দোষীক গ্ৰেপ্তাৰ কৰক আৰু ৰাজ্য চৰকাৰে অভিযুক্তক মৃত্যুদণ্ড নিশ্চিত কৰাৰ চেষ্টা কৰিব। প্ৰতিজন মানুহে ইয়াক গৰিহণা দিব লাগে।"
মণিপুৰ আৰক্ষীয়ে ইয়াৰ পূৰ্বে বুধবাৰে এক বিবৃতি প্ৰকাশ কৰি কয় যে থৌবাল জিলাৰ নংপক ছেকমাই থানাত অজ্ঞাত অস্ত্ৰধাৰী দুষ্কৃতিকাৰীৰ বিৰুদ্ধে অপহৰণ, দলবদ্ধ ধৰ্ষণ আৰু হত্যাৰ গোচৰ ৰুজু কৰা হৈছে আৰু অপৰাধীক অতি সোনকালে গ্ৰেপ্তাৰ কৰাৰ বাবে সৰ্বাত্মক প্ৰচেষ্টা চলি আছে।
ৰাজ্যত জনগোষ্ঠীয় হিংসাত্মক ঘটনা সংঘটিত হোৱাৰ মাত্ৰ এদিন পিছতে যোৱা ৪ মে’ত বি ফাইনম গাঁও জ্বলাই দিয়াৰ পিছতে কাংপকপি জিলাত সংঘটিত হয় এই নিন্দনীয় ঘটনা।
Continue Reading
