ডিজিটেল ডেস্কঃ জীমৰ ট্ৰেডমিলত দৌৰি থাকোঁতে বিদ্যুৎস্পৃষ্ট হৈ মৃত্যুক সাবটিলে এজন যুৱকে। দিল্লীত সংঘটিত হৈছে এই ভয়ংকৰ ঘটনা। দিল্লীৰ ৰোহিনী অঞ্চলৰ এটা জীমৰ ট্ৰেডমিলত দৌৰি থাকোঁতে বিদ্যুৎস্পৃষ্ট হৈ মৃত্যু হয় দিল্লীৰ এজন ২৪ বছৰীয়া যুৱকৰ। মৃত যুৱকজনৰ নাম সাক্ষম প্ৰকৃতি। ৰোহিনী ছেক্টৰ ১৯ৰ বাসিন্দা আছিল।
মৃত যুৱকজনে ১৫ নং ছেক্টৰৰ জিম্পলেক্স ফিটনেছ জ’নত সঘনাই আহিছিল। মঙলবাৰে সন্ধিয়া জীমত ট্ৰেডমিলত ব্যায়াম কৰি থকা অৱস্থাত হঠাতে সাক্ষম বাগৰি পৰে। ততাতৈয়াকৈ তেওঁক ৰোহিনী ছেক্টৰ ৬ৰ বাবা চাহেব আম্বেদকাৰ চিকিৎসালয়লৈ প্ৰেৰণ কৰা হয় আৰু পিছত তেওঁক মৃত বুলি ঘোষণা কৰা হয়।
আৰক্ষীৰ উপ-আয়ুক্ত (ৰোহিনী) গুৰিকবাল সিং সিদ্ধুৱে জনোৱা মতে, বাবা চাহেব আম্বেদকাৰ চিকিৎসালয়ত সাক্ষমৰ মৃত্যুৰ বিষয়ে আৰক্ষীক অৱগত কৰে। মৃতদেহটোৰ মৰণোত্তৰ পৰীক্ষাত বিদ্যুৎস্পৃষ্ট হৈ মৃত্যু হোৱাৰ কথা পোহৰলৈ আহে।
জীমৰ মেনেজাৰ অনুভ ডুগলক ইতিমধ্যে আৰক্ষীয়ে গ্ৰেপ্তাৰ কৰিছে। ভাৰতীয় দণ্ডবিধিৰ ২৮৭ ধাৰাত গোচৰ ৰুজু কৰা হৈছে। আৰক্ষীয়ে এই সন্দৰ্ভত অধিক তদন্তত নামি পৰিছে।
লক্ষণীয়ভাৱে চলিত বৰ্ষৰ আৰম্ভণিতে জানুৱাৰী মাহত সংঘটিত একেধৰণৰ এক কাণ্ডত মধ্যপ্ৰদেশৰ ইন্দোৰৰ এটা জীমত ৱৰ্কআউটৰ অন্তত প্ৰদীপ ৰঘুবংশী নামৰ ৫৫ বছৰীয়া এজন লোকৰ মৃত্যু হোৱাৰ খবৰ পোৱা গৈছিল।
Continue Reading
