ডিজিটেল ডেস্কঃদেশৰ বিমান বন্দৰসমূহৰ সুৰক্ষাৰ বিষয়টোকলৈ বিভিন্ন সময়ত আলোচনা হৈ থকাৰ সময়তে দেশৰ প্ৰথমটো বমান বন্দৰ হিচাবে মাংগালুৰু আন্তঃৰাষ্ট্ৰীয় বিমানবন্দৰৰ চৌহদত কৰ্তব্যৰত কেন্দ্ৰীয় ঔদ্যোগিক সুৰক্ষা বাহিনীৰ (চিআইএছএফ) বিমান সুৰক্ষা গোটক বুলেট প্ৰতিৰোধী বাহন প্ৰদান কৰা হৈছে।
ব্যুৰো অফ চিভিল এভিয়েচন চিকিউৰিটিয়ে (বিচিএএছ) বিমানবন্দৰ পৰিচালকসকলক চিআইএছএফৰ বিমান সুৰক্ষাৰ সৈতে জৰিত দলটোক এনে বাহনৰে সজ্জিত কৰিবলৈ নিৰ্দেশ দিয়াৰ পিছত মাংগালুৰু বিমানবন্দৰৰ কৰ্তৃপক্ষই বুলেটপ্ৰুফ বাহনখন ক্ৰয় কৰিছিল।
উল্লেখ্য মাংগালুৰু বিমান বন্দৰেই হৈছে দেশৰ প্ৰথমটো বিমানবন্দৰ যিটো বিমান বন্দৰত বুলেট প্ৰুফ বাহন ব্যৱহাৰ কৰা হৈছে৷ দেশৰ প্ৰথম অ-অতিসংবেদনশীল বিমানবন্দৰ হিচাবেও মাংগালুৰু বিমান বন্দৰে স্বীকৃতি লাভ কৰিছে।
বিমান সুৰক্ষা কৰ্মীসকলে যাতে যিকোনো সুৰক্ষা সম্পৰ্কীয় পৰিস্থিতিৰ মোকাবিলা কৰিব পাৰে সেই উদ্দেশ্য আগত ৰাখিয়েই সুৰক্ষা কৰ্মীৰ হাতত বুলেট প্ৰুফ বাহন তুলি দিয়া হৈছে৷
কেন্দ্ৰীয় ঔদ্যোগিক সুৰক্ষা বাহিনীয়ে সাধাৰণতে 'অতিসংবেদনশীল' মুম্বাই, বেংগালুৰু, দিল্লী আৰু হায়দৰাবাদ বিমানবন্দৰত অতন্দ্ৰ প্ৰহৰীৰ দৰে কাম কৰি থাকিবলগীয়া হৈছে৷
তেনে বিমানবন্দৰ কেইটাতো বাহিনীটোৰ কৰ্মীসকলক বুলেট প্ৰতিৰোধী বাহন প্ৰদান কৰাৰ কথা চলি আছে। বুলেট প্ৰুফ বাহন খনত সুৰক্ষাৰ স্বাৰ্থতে লাইট মেচিন গানো সংযুক্ত কৰা হৈছে৷
Continue Reading
