ডিজিটেল ডেস্কঃ উত্তৰাখণ্ডৰ নেইনীতালৰ পৰা পোহৰলৈ আহিছে এক আচৰিত ঘটনা। ডেষ্টিনেচন ৱেডিং কৰিবলৈ সাজু হোৱা এগৰাকী কইনাৰ মৃত্যু ঘটিছে।
দিল্লীৰ কইনা আৰু লক্ষ্ণৌৰ দৰা নেইনীতাল জিলাৰ এখন ৰিজ’ৰ্টত ডেষ্টিনেচন ৱেডিংৰ বাবে উপস্থিত হৈছিল। নিজৰ বিয়া বুলি খুব আনন্দত আছিল কইনাগৰাকী। মেহেন্দি অনুষ্ঠানৰ সময়ত কইনাই নাচি আছিল, তাতেই তেওঁ অচেতন হৈ পৰিল।
কইনাজনী অচেতন হোৱাৰ লগে লগে পৰিয়ালৰ লোকে খৰখেদাকৈ চি এইচ চি ভীমতাললৈ লৈ গ’ল। য'ত চিকিৎসকে প্ৰাথমিক পৰীক্ষাৰ অন্তত কইনাক মৃত ঘোষণা কৰিছিল। পৰিয়ালৰ সকলো সুখ কেইছেকেণ্ডমানৰ ভিতৰতে শোকলৈ পৰিণত হ’ল।
ঘটনা সন্দৰ্ভত তথ্য লাভ কৰাৰ পিছতে ঘটনাস্থলীত উপস্থিত হয় আৰক্ষী। সোধা-পোছাৰ অন্তত আৰক্ষীয়ে মৃতদেহটো মৰণোত্তৰ পৰীক্ষাৰ বাবে লৈ গৈ থকা অৱস্থাত পৰিয়ালে কোনো আইনী ব্যৱস্থা নকৰিবলৈ আৰক্ষীক আবেদন জনায়। ইয়াৰ পিছত আৰক্ষীয়ে তেওঁলোকক কন্যাৰ মৃতদেহ দিল্লীলৈ নিয়াৰ অনুমতি দিয়ে।
তথ্য অনুসৰি নতুন দিল্লী দ্বাৰকা ছেক্টৰ ৬ নিবাসী ডাঃ সঞ্জয় জৈনৰ ২৪ বছৰীয়া কন্যা শ্ৰেয়াৰ বিবাহ লক্ষ্ণৌৰ এজন যুৱকৰ সৈতে ঠিক কৰা হৈছিল। য'ত দুয়োৰে পৰিয়ালৰ সদস্যই ভীমলাল অঞ্চলৰ নৈনিতাল জিলাৰ নৌকুচিয়াটাল ৰিজৰ্টত শ্ৰেয়া আৰু লক্ষ্ণৌৰ যুৱকজনৰ বিবাহৰ বাবে ডেষ্টিনেচন ৱেডিংৰ আয়োজন কৰে। বিয়াৰ প্ৰস্তুতি খুব জোৰদাৰ প্ৰস্তুতিত চলি আছিল কিন্তু কেই মুহূৰ্ত মানৰ ভিতৰতে যে সকলো উলট-পালট হৈ যাব সেয়া কোনেও কল্পনা কৰা নাছিল।
ভীমতাল কমিউনিটি হেল্থ চেণ্টাৰৰ চিকিৎসকে নিশ্চিত কৰিছে যে সম্ভৱতঃ হৃদযন্ত্ৰৰ জটিলতাৰ বাবে তেওঁৰ মৃত্যু হৈছে।
Continue Reading
