দেশজুৰি প্ৰশংসিত কেপ্টেইন মনিকা খান্না! যাৰ তৎপৰতাত ৰক্ষা পৰিল বিমানত থকা ১৯১ জনৰ জীৱন

 বিমানখনৰ পাইলট আছিল কেপ্তেইন মনিকা খান্না। বিমানখনৰ পাইলট-ইন-কমাণ্ড (পিআইচি) কেপ্তেইন মনিকা খান্নাই আতংকিত নোহোৱাকৈ ক্ষতিগ্ৰস্ত ইঞ্জিনটো বন্ধ কৰি জৰুৰীকালীন অৱতৰণ কৰে। দেওবাৰে বিহাৰৰ ৰাজধানী পাটনাত স্পাইচজেট বিমানখন জৰুৰী অৱতৰণ কৰি ক্ৰুসহ ১৯১ জন লোকৰ জীৱন ৰক্ষা কৰাৰ বাবে সমগ্ৰ দেশেই শলাগ লৈছে কেপ্তেইন মনিকা খান্নাৰ। স্পাইচজেটৰ বিমান পৰিচালনাৰ মুৰব্বী গুৰচৰণ আৰোৰাৰ উদ্ধৃতিৰে বাতৰি সংস্থা এএনআইয়ে প্ৰকাশ কৰা অনুসৰি এই কাণ্ডৰ সময়ত কেপ্তেইন মনিকা খান্না আৰু প্ৰথম বিষয়া বলপ্ৰীত সিং ভাটিয়াই নিজকে ভালদৰে চম্ভালিছিল। গোটেই সময়খিনি তেওঁ শান্ত হৈ থাকিল আৰু বিমানখন ভালদৰে চম্ভালিলে।

 তেওঁলোক অভিজ্ঞ বিষয়া আৰু তেওঁলোকক লৈ আমি গৌৰৱান্বিত।মনিকা খান্না স্পাইচজেট লিমিটেডৰ এগৰাকী উচ্চ যোগ্যতাসম্পন্ন পাইলট। তেওঁৰ ইনষ্টাগ্ৰাম প্ৰফাইল অনুসৰি তেওঁ ভ্ৰমণ কৰি ভাল পায় আৰু ফেশ্বনৰ প্ৰতি তেওঁৰ তীব্ৰ আগ্ৰহ আছে। দেওবাৰে স্পাইচজেট বয়িং ৭৩৭ বিমানৰ ইঞ্জিনত জুই লগাত কেপ্তেইন মনিকা খান্নাই ক্ষতিগ্ৰস্ত ইঞ্জিনটো বন্ধ কৰি বিপদৰ সময়ত কাৰ্যদক্ষতাৰ পৰিচয় দিয়ে। দৰাচলতে এটা চৰাইৰ সংঘৰ্ষত বিমানখনৰ বাওঁ ইঞ্জিনত জুই লাগিছিল। মনিকা খান্নাই নিজৰ কাৰ্যদক্ষতা দেখুৱাই এটা ডাঙৰ দুৰ্ঘটনা ৰোধ কৰিবলৈ সক্ষম হল। বিপদৰ সময়ত অলপো বিচলিত নোহোৱাকৈ দিল্লী অভিমুখে ৰাওনা হোৱা বিমানখন পুনৰ নিৰাপদে পাটনা বিমানবন্দৰত অৱতৰণ কৰে মনিকা খান্নাই। এইগৰাকী সাহসী পাইলটৰ বাবেই এক ভয়ংকৰ বিমান দুৰ্ঘটনা হোৱাৰ পৰা ৰক্ষা পৰিল যাত্ৰীসকল।