ডিজিটেল ডেস্কঃ সাপে খুঁটিলে বা কামুৰিলে মানুহে বহুত ভয় খায়। বিপদৰ আশংকা কৰি কিছুমান যায় হাস্পতাললৈ বা কিছুমান যায় বেজৰ ওচৰলৈ। সাপে খুঁটিলে সদায় হাস্পতাললৈ যাব লাগে যাতে এণ্টিভেনম ল'ব পৰা যায়। এণ্টিভেনম লোৱাৰ পাছত আক্ৰান্ত লোকজনৰ জীৱন ৰক্ষা পৰাৰ বহুখিনি সম্ভাৱনা থাকে।এইখিনিতে এক আচৰিত ঘটনাৰ কথা পোহৰলৈ আহিছে। এজন কৃষকক এটা সাপে খুঁটিলে। সাপো খোঁটাত তেওঁৰ ইমানেই বেছি খং উঠিলে যে লগালগ তেওঁক সাপটোক কেঁচাই কেঁচাই চোবাই দিয়ে। এই ঘটনা উত্তৰ প্ৰদেশৰ বান্দাৰ।
কামাছিন থানা এলেকাৰ সায়োহাট গাঁৱৰ মাতৱদল যাদৱ (৫৫)য়ে কৃষিকৰ্ম কৰি ঘৰখন চলাই আছে। খেতি পথাৰৰ পৰা উভতি আহি মাতৱদল যাদৱ ঘৰৰ বিচনাত পৰি জিৰাই আছিল। হঠাতে এটা সাপ আহি মাতৱদল যাদৱক হাতত কামোৰে। এই কথাত তেওঁৰ ইমানেই খং উঠে যে তেওঁ তৎক্ষণাৎ সাপডাল হাতেৰে ধৰি কেঁচাই কেঁচাই চোবাই দিয়ে। পৰিয়ালৰ লোকে এই দৃশ্য দেখি আতংকিত হৈ ততাতৈয়াকৈ মাতৱদল যাদৱক কমিউনিটি হেল্থ চেণ্টাৰলৈ লৈ যায়। য'ত চিকিৎসকসকলে তেওঁক জিলা চিকিৎসালয়লৈ প্ৰেৰণ কৰে। বৰ্তমান তেওঁৰ অৱস্থা ঠিকেই আছে বুলি জনাইছে চিকিৎসকে। ডাক্তৰে কয় বৰ্তমান তেওঁ সংকটমুক্ত।
মাতৱদল যাদৱৰ পৰিয়ালৰ লোকে প্ৰথমে গাঁৱৰ বেজলৈ ফোন কৰিছিল। এই ঘটনা দেখি বেজো আচিৰত হৈ পৰিছিল। বেজে কৈছিল যে সাপে কামোৰাৰ ঔষধ আছে কিন্তু সাপ কেঁচাকৈ খোৱাৰ কোনো ঔষধ নাই। ট্ৰমা চেণ্টাৰৰ ডাঃ বিনীত শচানে কয় যে মাতৱদল যাদৱে খঙতে এটা সাপ খাইছিল। তেওঁৰ চিকিৎসা কৰা হৈছে। সাপৰ মূৰত বিষ থাকে, শৰীৰত নাথাকে। সাপ খালে বিষ বিয়পি নাযায়। সাপে কামুৰিলে বিষ বিয়পাই দিয়ে। বিষ তেজত নপৰিলে কোনো প্ৰভাৱ নপৰে অৰ্থাৎ কোনো বিষক্ৰিয়া নহয়। এই ঘটনাই অঞ্চলজুৰি চাঞ্চল্যৰ সৃষ্টি কৰিছে। মাতৱদল যাদৱ সংকটমুক্ত বুলি জানি পৰিয়ালৰ লোকৰ লগতে গাঁওবাসীয়ে স্বস্তিৰ নিঃশ্বাস পেলাইছে।
Continue Reading
