দেশলৈ ঘূৰি অহাৰ পিছতে গ্ৰেপ্তাৰ যৌন কেলেংকাৰীৰ গোচৰত অভিযুক্ত প্ৰজ্জ্বল ৰেভান্নাক, ছদিনৰ এছআইটিৰ জিম্মালৈ প্ৰেৰণ

আৰক্ষীৰ সূত্ৰই প্ৰকাশ কৰা মতে বৃহস্পতিবাৰে মাজনিশা জাৰ্মানীৰ পৰা ঘৰলৈ উভতি আহিছিল প্ৰজ্জ্বল ৰেভান্না। তেওঁ উভতি অহাৰ লগে লগে কেম্পেগৌড়া আন্তঃৰাষ্ট্ৰীয় বিমানবন্দৰৰ পৰা আৰক্ষীয়ে তেওঁক  গ্ৰেপ্তাৰ কৰে। শেহতীয়াকৈ জাৰ্মানীৰ পৰা দিয়া ভিডিঅ’ বাৰ্তাত  প্ৰজ্জ্বলে দাবী কৰিছে যে তেওঁ ৩০ মে’ৰ মাজনিশা ঘৰলৈ উভতি আহিব। ৩১ মে’ৰ পুৱা ১০ বজাত তেওঁ আত্মসমৰ্পণ কৰিব বুলিও কৈছিল। কিন্তু সেই সুযোগ নাপালে জেডিএছ নেতাজনে। তাৰ পূৰ্বেই  মাজনিশা বিমানবন্দৰৰ পৰা আৰক্ষীয়ে তেওঁক গ্ৰেপ্তাৰ কৰে।

ইয়াৰ পূৰ্বে প্ৰজ্জ্বলে দুবাৰকৈ ঘৰলৈ উভতি আহিবলৈ  টিকট  কাটিও পিছত বাতিল কৰিছিল।  গতিকে তেওঁ  ঘৰলৈ উভতি আহিব নে নাই তাকেলৈ আৰক্ষীৰ সন্দেহ হৈছিল।  বাংগালুৰু আৰক্ষীয়ে কেম্পেগৌডা বিমানবন্দৰৰ ওপৰত তীক্ষ্ণ দৃষ্টি ৰাখিছিল। অৱশেষত কৰ্ণাটক আৰক্ষীৰ বিশেষ তদন্তকাৰী দলে তেওঁক গ্ৰেপ্তাৰ কৰে। প্ৰজ্জ্বলে বাৰে বাৰে দাবী কৰি আহিছে যে তেওঁ এক ষড়যন্ত্ৰৰ বলি হৈছে। 

মন কৰিবলগীয়া যে  প্ৰজ্জ্বলৰ কেইবাটাও অশ্লীল ভিডিঅ’ এতিয়া বিয়পি পৰিছে। অভিযোগ উত্থাপন হৈছে যে প্ৰজ্জ্বল ৰেভান্নাই একেৰাহে তিনি বছৰ ধৰি নিজৰ ঘৰত কাম কৰা মহিলা আৰু একাংশ মহিলা চৰকাৰী কমৰ্চাৰীক  যৌন নিৰ্যাতন চলাইছিল। তদন্ত আৰম্ভ হোৱাৰ লগে লগে তেওঁ জাৰ্মানীলৈ পলায়ন কৰিছিল। কৰ্ণাটকৰ সিদ্দাৰমাইয়া চৰকাৰে প্ৰজ্জ্বলক ঘৰলৈ ঘূৰাই অনাৰ বাবে  উদ্যোগ লৈছিল। কেন্দ্ৰই ব্লু কৰ্ণাৰ জাননীও জাৰি কৰিছিল। পৰিস্থিতি প্ৰতিকূল বুলি উপলব্ধি কৰি প্ৰজ্জ্বল অৱশেষত দেশলৈ উভতি আহিছে। ইপিনে একাধিক মহিলাক যৌন নিৰ্যাতন চলোৱাৰ  অভিযোগত অভিযুক্ত নিলম্বিত জেডি(এছ) সাংসদ প্ৰজ্জ্বল ৰেভান্নাক বাংগালুৰুৰ আদালতে ৬ দিনৰ বাবে এছআইটিৰ  জিম্মালৈ প্ৰেৰণ কৰে। ৬ জুনলৈকে প্ৰজ্জ্বল ৰেভান্না এছ আই টিৰ জিম্মাত থাকিব। এছ আই টিয়ে সোধা-পোছাৰ বাবে প্ৰজ্জ্বল ৰেভান্নাক ১৪ দিনৰ জিম্মাত বিচাৰিছিল ।