ডিজিটেল ডেস্কঃ কাইলৈ লোকসভা নিৰ্বাচনৰ অনুষ্ঠিত হ’ব সপ্তম পৰ্যায়ৰ ভোটগ্ৰহণ। বিহাৰ, চণ্ডীগড়, হিমাচল প্ৰদেশ, ঝাৰখণ্ড, ওড়িশা, পঞ্জাৱ, উত্তৰ প্ৰদেশ আৰু পশ্চিমবংগকে ধৰি ৮ খন ৰাজ্য/কেন্দ্ৰীয় শাসিত অঞ্চলৰ ৫৭ টা লোকসভা সমষ্টিত কাইলৈ ভোটগ্ৰহণ কৰা হ’ব। একেদৰে কাইলৈ ওড়িশা বিধানসভাৰো বাকী ৪২ টা বিধানসভা সমষ্টিৰ বাবে একে সময়তে ভোটগ্ৰহণ অনুষ্ঠিত হ’ব।
কাইলৈ লোকসভা নিৰ্বাচনৰ সপ্তম পৰ্যায়ত মুঠ ৯০৪ গৰাকী প্ৰাৰ্থীৰ ভাগ্য ইভিএমত বন্দী হ’ব। উত্তৰ প্ৰদেশ আৰু পঞ্জাৱৰ তেৰখন আসন, পশ্চিম বংগৰ ৯খন, বিহাৰৰ ৮খন, ওড়িশাৰ ছখন, হিমাচল প্ৰদেশৰ ৪খন, ঝাৰখণ্ডৰ ৩খন আৰু চণ্ডীগড়ৰ এখন আসনৰ বাবে কাইলৈ ভোটগ্ৰহণ কৰা হ’ব। দেশত ১৯ এপ্ৰিলৰ পৰা আৰম্ভ হোৱা লোকসভা নিৰ্বাচনৰ ইতিমধ্যে ৬টা পৰ্যায়ত ৪৮৬খন লোকসভাৰ আসন বাবে ভোটগ্ৰহণ কৰা হৈ গৈছে। ৪ জুনত লোকসভা নিৰ্বাচনৰ ভোটগণনা কৰা হ’ব।কাইলৈ সপ্তম পৰ্যায়ত পুৱা ৭ বজাৰ পৰা ভোটগ্ৰহণ কেন্দ্ৰৰ দুৱাৰ মুকলি কৰা হ’ব। ভোটদান প্ৰক্ৰিয়া সন্ধিয়া ৬ বজালৈকে চলিব। সপ্তম পৰ্যায়ৰ নিৰ্বাচনত উল্লেখযোগ্য প্ৰাৰ্থীৰ ভিতৰত আছে বাৰানসী সমষ্টিৰ পৰা প্ৰধানমন্ত্ৰী নৰেন্দ্ৰ মোদী।
মোদীয়ে একেৰাহে তৃতীয়বাৰৰ বাবে জয়ৰ লক্ষ্য স্থিৰ কৰিছে। মোদীৰ বিৰুদ্ধে বাৰানসীত বিৰোধী কংগ্ৰেছ প্ৰাৰ্থী হৈছে অজয় ৰায়।গাজীপুৰত বৰ্তমান সমাজবাদী পাৰ্টিক প্ৰতিনিধিত্ব কৰা আফজল আনছাৰীয়ে ২০১৯ চনত লাভ কৰা আসনখন অক্ষুণ্ণ ৰখাৰ লক্ষ্য লৈছে।পাটনা চাহিবত প্ৰাক্তন কেন্দ্ৰীয় মন্ত্ৰী ৰবি শংকৰ প্ৰসাদে বিজেপিৰ এই দুৰ্গটোৰ পৰা পুনৰ নিৰ্বাচিত হ’বলৈ বিচাৰিছে। তেওঁ প্ৰত্যাহ্বানৰ সন্মুখীন হৈছে প্ৰাক্তন লোকসভা অধ্যক্ষ মেইৰা কুমাৰৰ পুত্ৰ কংগ্ৰেছ প্ৰাৰ্থী অংশুল অভিজিতৰ।মাণ্ডী সমষ্টিত বিজেপিৰ প্ৰাৰ্থী তথা বলীউডৰ অভিনেত্ৰী কংগনা ৰানাৱটৰ ৰাজনৈতিক ভাগ্য কাইলৈ নিৰ্ণয় হ’ব।
Continue Reading
