ডিজিটেল ডেস্কঃ দেশত শেহতীয়াকৈ দ্ৰুত ৰূপত সংক্ৰমণ হৈছে ক’ভিড ১৯৷ দেশৰ বিভিন্ন ৰাজ্যই ক’ভিড ১৯ ৰ গণ সংক্ৰমণ ৰোধ কৰাৰ বাবে গ্ৰহণ কৰিছে কেতবোৰ পদক্ষেপ৷ মুম্বাইত যোৱা ২৪ ঘণ্টাৰ ভিতৰত ২০,১৮১ টা নতুন কোভিড কেছ আৰু ৪ গৰাকী লোকৰ মৃত্যু হৈছে।
দেশৰ অৰ্থনৈতিক ৰাজধানীত সক্ৰিয় ৰোগীৰ সংখ্যা এতিয়া ৭৯,২৬০ লৈ বৃদ্ধি পাইছে। চহৰৰ চিকিৎসালয়সমূহ এতিয়া ১৬ শতাংশ বিচনা কেৱল ক’ভিড ৰোগীৰে ভৰি আছে। ইফালে, মুম্বাইত ৫০০ তকৈও অধিক আবাসিক অট্টালিকা বন্ধ কৰি দিছে প্ৰশাসনে৷ বৃহন্মুম্বাই পৌৰ নিগমৰ (বিএমচি) মতে, বৃহস্পতিবাৰে মুম্বাইৰ ধাৰাৱীত ১০৭ টা নতুন কোভিড-১৯ সংক্ৰমিত ৰোগীকো নিশ্চিত কৰা হৈছে, যি হৈছে এদিনত সৰ্বাধিক সংখ্যক ৰোগী।
ইফালে ক’ভিড ১৯ ৰ ভয়াবহ গণ সমক্ৰমণৰ প্ৰতি লক্ষ্য ৰাখি দেশৰ বিভিন্ন ৰাজ্যই নিজাববীয়াকৈ গ্ৰহণ কৰিছে পদক্ষেপ৷ দেশৰ কেইবাখনো ৰাজ্যত নৈশ সান্ধ্য আইন গ্ৰহণ কৰাৰ সমান্তৰালকৈ নিষিদ্ধ কৰিছে সকলো ৰাজহুৱা জনসমাগম৷ ইফালে অসমতো ক’ভিড ১৯ গুৰুতৰ ৰূপ ধাৰণ কৰিছে৷ ৰাজ্যত দৈনিক বৃদ্ধি পাইছে ক’ভিড আক্ৰান্তৰ সংখ্যা৷ ইয়াকে লৈ এতিয়া ৰাজ্য চৰকাৰে নৈশ সান্ধ্য আইনকে ধৰি বিভিন্ন পদক্ষেপ গ্ৰহণ কৰিছে৷
ইফালে জম্মু কাশ্মীৰতো বৰফৰ পথৰ মাজেৰে পাৰ হৈ যোৱা পৰ্যটকসকলকো দেশৰ স্বাস্থ্য কৰ্মীসকলে টিকাকৰণ কাৰ্যসূচী গ্ৰহণ কৰিছে৷ স্বাস্থ্য কৰ্মীসকলৰ এই পদক্ষেপৰ প্ৰতি সকলোলোকে এতিয়া সহাৰি জনাইছে৷
