দেশত অ'মিক্ৰনত আক্ৰান্তৰ সংখ্যা বৃদ্ধি ৭৩লৈ : শিশুও আক্ৰান্ত

ডিজিটেল ডেস্ক : কৰ'নাৰ সংক্ৰমণ পুনৰ বৃদ্ধিয়ে চিন্তাত পেলাইছে জনতাক৷ প্ৰতিষেধক গ্ৰহণ কৰাৰ পাছতো ক'ভিডৰ সংক্ৰমণ অস্বাভাবিক হাৰত বৃদ্ধি পাইছে ক'ভিড৷ ব্ৰিটেইনত এটা নিশাৰ ভিতৰতে প্ৰায় ৭৯ হাজাৰ লোক আক্ৰান্ত হৈছে ক'ৰনাত। ক'ভিডৰ নতুন প্ৰজাতি অ'মিক্ৰমনক কেন্দ্ৰ কৰি সৃষ্টি হোৱা উদ্বেগৰ মাজতে দেশখনত হঠাতে বৃহৎ সংখ্যক লোক ক'ৰনাত আক্ৰান্ত হোৱাক লৈ সৃষ্টি হৈছে শংকাৰ।

বুধবাৰৰ দিনটোত ব্ৰিটেইনত মুঠ ৭৮,৬১০ গৰাকী লোক নতুনকৈ ক'ৰনাত আক্ৰান্ত হৈছে। দেশখনত বৰ্তমানলৈকে মুঠ ৬.৭০ কোটি জনতাৰ ভিতৰত ১.১০ কোটিৰো অধিক লোক ক'ভিডত আক্ৰান্ত হৈছে। অ'মিক্ৰনৰ শংকাৰ প্ৰতি লক্ষ্য ৰাখি ব্ৰিটিছ প্ৰধানমন্ত্ৰী বৰিছ জনছনে দেশবাসীক অতি বিপদজনক পৰিস্থিতিৰ সতৰ্কবাণী জাৰি কৰিছে। উল্লেখ্য যে বিশ্বত অ'মিক্ৰনৰ দ্বাৰা আক্ৰান্ত ব্যক্তিৰ মৃত্যুৰ ঘটনা ব্ৰিটেইনতে প্ৰথমটো সংঘটিত হৈছে।

ইফালে বুধবাৰে দিনটোত পশ্চিমবংগ আৰু তামিলনাডুত নতুনকৈ অ'মিক্ৰনত আক্ৰান্ত চিনাক্ত হৈছে। তামিলনাডুৰ স্বাস্থ্যমন্ত্ৰী এ সুব্ৰমনিয়ামে কৈছে যে ৪৭ বছৰীয়া এগৰাকী ব্যক্তি অ'মিক্ৰনৰ দ্বাৰা সংক্ৰমিত হৈছে। আক্ৰান্ত ব্যক্তিজন নাইজেৰিয়াৰ পৰা উভতি আহিছিল।

পশ্চিমবংগত এটি ৭ বছৰীয়া শিশু আক্ৰান্ত হৈছে অ'মিক্ৰনত। শিশুটি নিজ পৰিয়ালৰ সৈতে আবু ধাবিৰ পৰা হায়দৰাবাদ হৈ কলকাতালৈ আহিছিল। আনহাতে মহাৰাষ্ট্ৰ আৰু কেৰালাত ৪ জনকৈ লোক নতুনকৈ অ'মিক্ৰনত সংক্ৰমিত হৈছে। মহাৰাষ্ট্ৰৰ ওচমানাবাদত নতুনকৈ ২ জন ব্যক্তি, মুম্বাই আৰু বুলধানাত ১জনৈক লোক অ'মিক্ৰনত আক্ৰান্ত হৈছে। ৰাজ্যখনত বৰ্তমান অমিক্ৰন ৰোগীৰ সংখ্যা ৩২ জনলৈ বৃদ্ধি হৈছে। কেৰালাত বৰ্তমানলৈকে মুঠ ৫ জন ব্যক্তি অ'মিক্ৰনত আক্ৰান্ত হৈছে। দেশত বুধবাৰলৈকে অ'মিক্ৰনত আক্ৰান্তৰ সংখ্যা ৭৩ গৰাকীলৈ বৃদ্ধি পাইছে।