ডিজিটেল ডেস্কঃ দেশত পূৰ্ণগতিত চলি আছে লোকসভা নিৰ্বাচনৰ তৃতীয় পৰ্যায়ৰ ভোটগ্ৰহণ৷ এতিয়ালৈকে দেশত সামগ্ৰীক ভোটদানৰ হাৰ ২৫.৪ শতাংশ, পশ্চিম বংগত সৰ্বাধিক ভোটদান হৈছে৷ মঙলবাৰে পুৱা ৭ বজাত লোকসভাৰ তৃতীয় পৰ্যায় আৰম্ভ হয়৷ ভোটাৰসকলে ১১ খন ৰাজ্য আৰু কেন্দ্ৰীয় শাসিত অঞ্চলৰ ৯৩ টা সমষ্টিত তেওঁলোকৰ পছন্দৰ প্ৰাৰ্থীৰ বাবে ই ভি এমৰ বুটাম টিপিবলৈ ওলাই আহে।
আবেলি ৫ বজালৈকে ভোটদান অব্যাহত থাকিব। ভাৰতীয় নিৰ্বাচন আয়োগে কৈছে যে দেশৰ ১.৮৫ লাখ ভোটকেন্দ্ৰত ১৭.২৪ কোটিতকৈও অধিক ভোটাৰ আছে৷ তেওঁলোকৰ ভিতৰত ৮.৮৫ কোটি পুৰুষ আৰু ৮.৩৯ কোটি মহিলা ভোটাৰ আছে৷ ভোটগ্ৰহণ সুচাৰুৰূপে সম্পন্ন কৰিবলৈ প্ৰায় ১৮.৫ লাখ ভোটগ্ৰহণ বিষয়া মোতায়েন কৰা হয় । তৃতীয় পৰ্যায়ৰ নিৰ্বাচনত 1,300 ৰো অধিক প্ৰাৰ্থী আছে, যাৰ ভিতৰত আছে ১২০ গৰাকী মহিলা প্ৰাৰ্থী আছে। তৃতীয় পৰ্যায়ৰ ভোটগ্ৰহণ অসম, ছত্তীশগড়, গোৱা, গুজৰাট, কৰ্ণাটক, কেন্দ্ৰীয় শাসিত অঞ্চল দাদৰা আৰু নগৰ হাভেলি আৰু দমন আৰু দিউৰ একমাত্ৰ আসনত অনুষ্ঠিত হৈছে। অসমৰ চাৰিখন,বিহাৰৰ পাঁচখন, পশ্চিম বংগৰ পাঁচখন, উত্তৰ প্ৰদেশত দহখন, মধ্য প্ৰদেশত নখন আৰু মহাৰাষ্ট্ৰত এঘাৰখন আসনত ভোটগ্ৰহণ অনুষ্ঠিত হৈছে। তৃতীয় পৰ্যায়ৰ নিৰ্বাচনত উল্লেখযোগ্য প্ৰাৰ্থীসকলৰ ভিতৰত আছে গুজৰাটৰ গান্ধীনগৰত গৃহমন্ত্ৰী অমিত শ্বাহ, কেন্দ্ৰীয় মন্ত্ৰী জ্যোতিৰাদিত্য সিন্ধিয়া, বংগৰ বহৰমপুৰত কংগ্ৰেছৰ অধীৰ ৰঞ্জন চৌধুৰী, টিএমচিৰ প্ৰাক্তন ক্ৰিকেটাৰ ইউছুফ পাঠান, কংগ্ৰেছৰ দিগ্বিজয় সিং ,সমাজবাদী পাৰ্টিৰ ডিম্পল যাদৱ আৰু আদিত্য যাদৱ আদি। ভাৰতৰ নিৰ্বাচন আয়োগৰ তথ্য অনুসৰি পুৱা ১১ বজালৈকে ২৫.৪ শতাংশ ভোটদান হৈছে আৰু পশ্চিম বংগ পুৱা ১১ বজালৈকে ৩২.৮২ শতাংশৰ সৈতে তালিকাত আগবাঢ়ি আছে।
গোৱাত ৩০.৯৪ শতাংশ ভোটদান হৈছে। মহাৰাষ্ট্ৰত পুৱা ১১ বজালৈকে ১৮.১৮ শতাংশ ভোটদান হৈছে৷ ১১ বজালৈ আন ৰাজ্যসমূহৰ ভোটদানৰ শতাংশ ইয়াত আছে - অসম-২৭.৩৪ শতাংশ, বিহাৰ ২৪.৪১ শতাংশ, ছত্তীশগড় ২৯.৯০ শতাংশ, গুজৰাট ২৪.৩৫ শতাংশ, কৰ্ণাটক ২৪.৪৮ শতাংশ, মধ্য প্ৰদেশ ৩০.২১ শতাংশ আৰু উত্তৰ প্ৰদেশ ২৬.১২ শতাংশ। কেন্দ্ৰীয় শাসিত অঞ্চল দাদৰা আৰু নগৰ হাভেলি আৰু দমন আৰু দিউত পুৱা ১১ বজালৈকে ২৪.৬৯ শতাংশ ভোটদান হৈছে।
Continue Reading
