ডিজিটেল ডেস্কঃ ছাৰ্বিয়াৰ ৰাজধানী বেলগ্ৰেডত সংঘটিত হৈছে এটা অভাৱনীয় ঘটনা। চহৰখনৰ এখন বিদ্যালয়ত ১৪ বছৰীয়া এজন ছাত্ৰই কমেও ৮ জন সহপাঠীক গুলীয়াই হত্যা কৰিছে। বিদ্যালয়খনৰ এজন নিৰাপত্তাৰক্ষীও নিহত হৈছে।
তদুপৰি ৬ গৰাকী শিক্ষাৰ্থী আৰু এজন শিক্ষক আহত হয়। দেশখনৰ গৃহ মন্ত্ৰালয়ে দিয়া বিবৃতি অনুসৰি আহতসকলক চিকিৎসালয়ত ভৰ্তি কৰোৱা হৈছে।
মধ্য বেলগ্ৰেডৰ ভ্লাডিস্লাভ ৰিবনিকাৰ স্কুলত ৩ মে’ৰ পুৱা সংঘটিত হৈছিল এই ঘটনা। এই সম্পৰ্কত এজন ১৪ বছৰীয়া ছাত্ৰক আৰক্ষীয়ে গ্ৰেপ্তাৰ কৰিছে। ছাত্ৰজনৰ নাম ক’ষ্টা কেকমান’ভিক। ক’ষ্টাই ২০০৯ চনত জন্মলাভ কৰিছিল।
বাতৰি মতে, সন্দেহযুক্ত ছাত্ৰজনে এই আক্ৰমণত তেওঁৰ পিতৃৰ বন্দুক ব্যৱহাৰ কৰিছিল। ঘটনাৰ কাৰণ জানিবলৈ ইতিমধ্যে তদন্ত আৰম্ভ কৰা হৈছে।
উল্লেখ্য যে ছাৰ্বিয়াত বন্দুকৰ মালিকীস্বত্ব ইউৰোপৰ ভিতৰতে সৰ্বাধিক। সেয়ে দেশখনত অতি কঠোৰ বন্দুক আইন আছে।এনেধৰণৰ গুলীচালনাও তুলনামূলকভাৱে বিৰল।
Continue Reading
