ডিজিটেল ডেস্কঃ প্ৰকৃতিৰ যেন ৰোষত পৰিছে হিমাচল প্ৰদেশ। বিগত কিছুদিন ধৰি হৈ থকা ধাৰাসাৰ বৰষুণৰ ফলত হিমাচল প্ৰদেশত জনজীৱন ব্যাহত হৈ পৰিছে। বহু ঠাইত পানীৰ ঢলে ৰাষ্ট্ৰীয় ঘাইপথ খহাই পেলাইছে। বহু ঠাইত পানীয়ে গাড়ী উটুৱাই নিছে।
আনকি কিছুমান ঠাইত দোকান , এটিএমবোৰো পানীত ডুব গৈছে । চম্বা, কাংৰা, কুল্লু, মাণ্ডি, উনা, হামিৰপুৰ আৰু বিলাসপুৰত বতৰ বিজ্ঞান বিভাগে ৰেড এলাৰ্ট জাৰি কৰিছে।
আনহাতে, চিমলা, চিৰমূৰ আৰু চোলানত কমলা সতৰ্কবাণী জাৰি কৰিছে। লাহৌল আৰু স্পিতিত হালধীয়া সতৰ্কবাণী জাৰি কৰা হৈছে। ৰাজ্যিক বতৰ বিজ্ঞান বিভাগৰ মতে যোৱা দুদিনত হিমাচল প্ৰদেশত ২০৪ মিমি বৰষুণ হৈছে। পাহাৰীয়া জিলাসমূহত ১০ জুলাইলৈকে ধাৰাসাৰ বৰষুণৰ সতৰ্কবাণী জাৰি কৰা হৈছে।বৰষুণৰ ফলত প্ৰায় ৯০ টা পথ ক্ষতিগ্ৰস্ত হৈছিল।
ইয়াৰ ভিতৰত কেৱল চিমলাতে ৩৯ টা পথ ক্ষতিগ্ৰস্ত হৈছে । যোৱা দুদিনৰ বৰষুণৰ ফলত বিট্টা নদী বিপজ্জনক ভাবে বাঢ়ি আহিছে। বহু ঠাইত নদীখন বিপদসীমাৰ ওপৰেৰে বৈ আছে। কুল্লুৰ চণ্ডিগড়-মানালী ৰাষ্ট্ৰীয় ঘাইপথৰ এটা অংশ পানীয়ে খহাই নিয়াত যাতায়াত ব্যাহত হৈ পৰিছে। মাণ্ডি আৰু কুল্লুৰ মাজত বহুতো বাহন আৱদ্ধ হৈ পৰিছে। আনহাতে, কুল্লু আৰু উনাত বহু বাহন পানীয়ে উটুৱাই নিছে। শেহতীয়া বানত হিমাচলত পৰ্যটকৰো মৃত্যু ঘটিছে। ধাৰাসাৰ বৰষুণৰ ফলত হিমাচল প্ৰদেশত বান আৰু ভূমিস্খলনৰ সৃষ্টি হৈছে।
Continue Reading
