ডিজিটেল ডেস্ক: বতৰ বিজ্ঞান বিভাগৰ সতৰ্কবাণী আৰু বিগত দুদিনধৰি নেৰানেপেৰা বৰষুণৰ প্ৰতি লক্ষ্য ৰাখি সোমবাৰে দিল্লীৰ সকলো বিদ্যালয় এদিনৰ বাবে বন্ধ ৰখা হ’ব বুলি দেওবাৰে মুখ্যমন্ত্ৰী অৰবিন্দ কেজৰিৱালে ঘোষণা কৰে।
উত্তৰ-পশ্চিম ভাৰতত তীব্ৰ বৰষুণে জনজীৱন ব্যাহত কৰিছে৷ দিল্লীতো এই ঋতুৰ প্ৰৱল বৰষুণে ব্যাহত কৰিছে স্বাভাৱিক জীৱনযাত্ৰা৷ দিল্লীত চৌবিশ ঘণ্টাত ১৫৩ মি:মি: বৰষুণে ১৯৮২চনৰ অভিলেখ ভংগ কৰিছে৷ দিল্লীত ১৯৮২ চনৰ পাছত জুলাইত এটা দিনত এয়া সৰ্বাধিক বৰষুণ৷
লগতে, ১৯৫৮ চনৰ পিছত জুলাই মাহৰ বাবে এয়া তৃতীয় সৰ্বাধিক এদিনীয়া বৰষুণ বুলি বতৰ বিজ্ঞান বিভাগে সদৰী কৰিছে৷ বতৰ বিজ্ঞান বিভাগে দিল্লীত পৰৱৰ্তী ২-৩ দিনৰ বাবে প্ৰৱল বৃষ্টিপাতৰ আশংকা কৰি সতৰ্কতা জাৰি কৰিছে৷
দেওবাৰে ধাৰাসাৰ বৰষুণৰ ফলত এখন দিল্লীৰ চৰকাৰী বিদ্যালয়ৰ সীমাৰ দেৱাল খহি পৰে। দিল্লীৰ শিক্ষামন্ত্ৰী আতিশীয়ে শিক্ষা বিভাগৰ জ্যেষ্ঠ বিষয়া, অধ্যক্ষ আৰু উপ-অধ্যক্ষসকলক সকলো চৰকাৰী বিদ্যালয়ৰ আন্তঃগাঁথনি পৰিদৰ্শন কৰিবলৈ নিৰ্দেশ দিছে।
Continue Reading
