ধৰ্মীয় মৌলবাদীৰ উন্মাদনা: বাংলাদেশৰ ইস্কন মন্দিৰত আক্ৰমণ

ডিজিটেল ডেস্ক: বাংলাদেশৰ ঢাকাত পুনৰ হিন্দু মন্দিৰত আক্ৰমণৰ ঘটনা সংঘটিত হৈছে৷ দুই শতাধিক লোকে লণ্ডভণ্ড কৰিলে ইস্কনৰ ৰাধাকান্ত মন্দিৰ৷ জানিব পৰামতে, বাংলাদেশৰ ঢাকাৰ ইস্কন মন্দিৰত দুৰ্বৃত্তৰ আক্ৰমণৰ ফলত বহু লোক আহত হয়। বাতৰি অনুসৰি, ঢাকাৰ ৱাৰীত থকা ২২২, লাল মোহন সাহা ষ্ট্ৰীটৰ মন্দিৰৰ বহু সদস্য এই আক্ৰমণত আহত হৈছিল। দুই শতাধিক লোকৰ দুৰ্বৃত্তৰ দলটোক নেতৃত্ব দিছিল হাজী শফিউল্লাহে৷ বিগত বৰ্ষতো বাংলাদেশৰ কুমিল্লা চহৰৰ নানুৰ দিঘি হ্ৰদৰ ওচৰৰ দুৰ্গা পূজাৰ পেণ্ডেলত কোৰাণ ৰখাৰ বাতৰি প্ৰচাৰ হোৱাৰ পাছত হিংসাত্মক ঘটনা সংঘটিত হৈছিল৷ যি ঘটনাত তিনিজন লোক নিহত হৈছিল। ইয়াৰ পূৰ্বে, ঢাকাৰ টিপু চুলতান ৰোড আৰু চিটাগঙৰ কোতৱালীতো একে ধৰণৰ ঘটনা সংঘটিত হৈছিল। ইফালে, ইস্কন ইণ্ডিয়াৰ উপ-সভাপতি ৰাধাৰমন দাসে টুইটাৰযোগে আজিৰ ঘটনকক গৰিহণা দিয়ে। তেওঁ কয়, এইটো এটা অতি দুৰ্ভাগ্যজনক ঘটনা যিটো দৌল যাত্ৰা আৰু হোলী উদযাপনৰ প্ৰাকমুহূৰ্তত সংঘটিত হৈছিল। মাত্ৰ কেইদিনমান আগতে ৰাষ্ট্ৰসংঘই ১৫ মাৰ্চ দিনটোক ইছলামোফোবিয়াৰ বিৰুদ্ধে যুঁজিবলৈ আন্তৰ্জাতিক দিৱস হিচাপে ঘোষণা কৰি এক প্ৰস্তাৱ গৃহীত কৰিছিল। তেওঁ লগতে কয়, আমি আচৰিত যে একেখন ৰাষ্ট্ৰসংঘই হাজাৰ হাজাৰ অসহায় বাংলাদেশী আৰু পাকিস্তানী সংখ্যালঘুৰ দুখ-কষ্টৰ ওপৰত মৌন হৈ আছে। সেয়েহে বহুতো হিন্দু সংখ্যালঘুই প্ৰাণ হেৰুৱাইছে, সম্পত্তি হেৰুৱাইছে, ধৰ্ষিতা হৈছে৷ কিন্তু হায়! ৰাষ্ট্ৰসংঘই কৰিব পৰা সকলোবোৰ হৈছে ইছলামোফোবিয়াৰ ওপৰত চিন্তা কৰা। এনেদৰে, এতিয়া বাংলাদেশত সংখ্যালঘু হিন্দু ধৰ্মাৱলম্বী লোকৰ জীৱনলৈ নামি আহিছে সংশয়৷ ধৰ্মীয় উপাসনাস্থলীতো চলিছে দমন-উৎপীড়ন৷ পৰৱৰ্তী সময়ত বাংলাদেশৰ ইস্কন মন্দিৰ আক্ৰমণৰ ঘটনাই কি মোৰ লয়, সেয়া লক্ষ্যণীয় হ’ব৷