ডিজিটেল ডেস্কঃ একেৰাহে পাঁচগৰাকী মহিলাক ‘ধৰ্ষণ’ৰ দৰে নিকৃষ্ট কাণ্ড কৰি দোষী সাব্যষ্ট হ’ল নৰেন্দ্ৰ মোদীৰ এজন সমৰ্থক। অষ্ট্ৰেলিয়াৰ ছিডনী নিবাসী এইজন ধৰ্ষণকাৰীৰ নাম হৈছে বালেশ ধনকৰ। ইতিমধ্যে তেওঁ আদালতে দোষী সাব্যস্ত কৰিছে।
জীৱিকা প্ৰদানৰ নামত মাতি আনি ড্ৰাগছ সেৱন কৰাই ধনকৰে কেইবাগৰাকী মহিলাৰ ওপৰত শাৰীৰিক নিৰ্যাতন চলাই আহিছিল। তাৰ ভিডিঅ’ও তেওঁ বনাইছিল।
লক্ষ্যণীয়ভাৱে এইগৰাকী প্ৰৱাসী ভাৰতীয় বিজেপিৰ ঘনিষ্ঠ বুলি পোহৰলৈ আহিছে। আনকি প্ৰধানমন্ত্ৰী নৰেন্দ্ৰ মোডীৰ সৈতে একেখন মঞ্চতে তেওঁৰ ছবিও দেখা গৈছে।
বালেশ ধনকৰে বিজেপিৰ সমৰ্থনত আনকি অষ্ট্ৰেলিয়াত প্ৰবাসীসকলকলৈ সংগঠন এটা গঠন কৰে। সংগঠনটোৰ নাম- ‘অ’ভাৰচীজ ফ্ৰেণ্ডছ অফ বিজেপি’। প্ৰধানমন্ত্ৰী নৰেন্দ্ৰ মোডীক লগ পোৱাৰ ছবিও তেওঁৰ হাতত আছে। সেই ছবিখন এতিয়াও ধনকৰৰ ৱেবছাইটত জিলিকি আছে।
আনকি এনএছডব্লিউৰ চৰকাৰী অনুষ্ঠানতো তেওঁ ভাষণ দিছিল। মুঠতে ছিডনীৰ এই কুখ্যাত ধৰ্ষণকাৰীৰ সৈতে মোডী আৰু বিজেপিৰ ঘনিষ্ঠতা প্ৰকাশ পোৱাত গেৰুৱা শিবিৰ অস্বস্তিত পৰিছে।
জানিব পৰা মতে, ছিডনীত বালেশ ধনকৰ অকলে বাস কৰিছিল। কোৰিয়ান চিনেমা, সংগীতৰ লগতে কোৰিয়ান খাদ্য ভাল পাইছিল। কোৰিয়ান পৰ্ণও আছিল প্ৰিয়। যৌন জীৱনটোক সেই পৰ্ণৰ দৰে ৰঙীণ কৰিব বিচাৰিছিল। আৰু সেইবাবেই ধনকৰে বাছি লৈছিল এটা নতুন পন্থা।
আদালতৰ সূত্ৰ অনুসৰি, কেইবছৰমানৰ আগতে ছ’চিয়েল মিডিয়াত ‘কোৰিয়ান অনুবাদক বিচাৰি’ বিজ্ঞাপন দিছিল। সেই সূত্ৰৰ ভিত্তিত এগৰাকীৰ পিছত আনগৰাকী মহিলাই তেওঁৰ সৈতে যোগাযোগ কৰিছিল।
বালেশ ধনকাৰে তেওঁলোকক কেফেলৈ মাতি আনি ‘ভুৱা সাক্ষাৎকাৰ’ লৈছিল। তাৰ পৰা মহিলাসকলক ৰাতিৰ আহাৰ গ্ৰহণ কৰিবলৈ লৈ গৈছিল। তাৰ পিছত কোনো অজুহাত উলিয়াই তেওঁলোকক নিজৰ ফ্লেটলৈ লৈ গৈ ড্ৰাগছ খুৱাই অচেতন কৰি তুলিছিল। তাৰ পিছত চলাইছিল শাৰীৰিক নিৰ্যাতন। ইয়াৰ ৰেকৰ্ডো কৰা হৈছিল।
সেই অভিযোগত আদালতে ধনকৰক দোষী সাব্যস্ত কৰিছে। অহা মে’ মাহত তেওঁৰ শাস্তি ঘোষণা কৰা হ’ব।
