কেন্দ্ৰীয় বন্দৰ, জাহাজ পৰিবহন আৰু জলপথ মন্ত্ৰী সৰ্বানন্দ সোণোৱালে ডিব্ৰুগড় চহৰৰ ক্ৰমৱৰ্ধমান যানজঁট সমস্যাৰ এক স্থায়ী সমাধান সূত্ৰ উলিওৱাৰ লগতে চহৰখনৰ সামগ্ৰিক আন্তঃগাঁথনিমূলক উন্নয়নৰ বাবে সোমবাৰে এখন গুৰুত্বপূৰ্ণ পর্যালোচনা সভাত অংশগ্ৰহণ কৰে। এই সভাত ডিব্ৰুগড়ৰ যানজঁট নিয়ন্ত্ৰণ আৰু নাগৰিকসকলৰ বাবে মসৃণ যাতায়াত নিশ্চিত কৰাৰ লক্ষ্যৰে বিভিন্ন কৌশল আৰু পৰিকল্পনা সন্দৰ্ভত বিতং আলোচনা কৰা হয়।
আলোচনাৰ অন্যতম মূল বিষয় আছিল চহৰৰ যানজঁট হ্ৰাস কৰাৰ বাবে ৰে’লৱেৰ ভূমিত এক আধুনিক পাৰ্কিং সুবিধা নিৰ্মাণৰ কাম ক্ষিপ্ৰতাৰে আগবঢ়োৱা। মন্ত্ৰীগৰাকীয়ে এই প্ৰকল্পৰ তাৎক্ষণিক ৰূপায়ণৰ ওপৰত বিশেষ গুৰুত্ব আৰোপ কৰে। তেওঁ উল্লেখ কৰে যে এনে পদক্ষেপসমূহে উন্নত চহৰীয়া পৰিকল্পনা, মসৃণ যান-বাহন ব্যৱস্থাপনা আৰু ডিব্ৰুগড়ৰ জনসাধাৰণৰ সৰ্বোচ্চ সুবিধা নিশ্চিত কৰাত সহায় কৰিব।
এই উচ্চস্তৰীয় সভাত ডিব্ৰুগড়ৰ উপায়ুক্ত, উত্তৰ-পূব সীমান্ত ৰে’লৱেৰ তিনিচুকীয়া সংমণ্ডলৰ সংমণ্ডল ৰে’লৱে প্ৰৱন্ধক (DRM), ডিব্ৰুগড় পৌৰ নিগমৰ মেয়ৰ, উপ-মেয়ৰ আৰু আয়ুক্তকে ধৰি কেইবাজনো জ্যেষ্ঠ বিষয়া উপস্থিত আছিল। মন্ত্ৰী সোণোৱালে সামাজিক মাধ্যম যোগে জনাইছে যে ডিব্ৰুগড়ৰ জনসাধাৰণৰ সুবিধাৰ্থে এই সকলোবোৰ পদক্ষেপৰ দ্ৰুত কাৰ্যকৰীকৰণ তেওঁলোকৰ বাবে সৰ্বোচ্চ অগ্ৰাধিকাৰ।
উল্লেখ্য যে, ডিব্ৰুগড়ৰ দৰে দ্রুতগতিত বিকশিত হৈ থকা চহৰসমূহত যানজঁট এক গুৰুতৰ সমস্যা হিচাপে দেখা দিছে। কেন্দ্ৰীয় মন্ত্ৰীগৰাকীৰ এই প্ৰচেষ্টাই চহৰখনৰ যানজঁট সমস্যা সমাধানত এক নতুন গতি প্ৰদান কৰিব বুলি আশা কৰা হৈছে।
Continue Reading
