ডিজিটেল ডেস্কঃ দিল্লীৰ এইমছত সংঘটিত হৈছে ভয়ংকৰ অগ্নিকাণ্ডৰ ঘটনা। সোমবাৰে দিল্লীস্থিত এইমছৰ পুৰণি ৰাজ কুমাৰী অ'পিডি ভৱনৰ দ্বিতীয় মহলাৰ জৰুৰীকালীন ৱাৰ্ডৰ কাষতেই অৱস্থিত এণ্ডোস্কোপী কোঠাত হঠাৎ সূত্ৰপাত হয় জুইৰ। ঘটনা সংঘটিত হোৱাৰ লগে লগে ততাতৈয়াকৈ ৮খন অগ্নি নিৰ্বাপক বাহিনীৰ বাহনে জুই নিয়ন্ত্ৰণ কৰিবলৈ চেষ্টা কৰে।
পুৱা প্ৰায় ১১:৫৪ বজাত জৰুৰীকালীন ৱাৰ্ডটোত সূত্ৰপাত হয় এই অগ্নিকাণ্ড। এই খবৰ বিয়পি পৰাৰ লগে লগে কাষৰ সকলো ৰোগী আৰু কৰ্মচাৰীক অন্য স্থানলৈ স্থানান্তৰ কৰা হয়। উল্লেখ্য বৰ্তমান নিয়ন্ত্ৰিত অৱস্থাত থকা অগ্নিকাণ্ডৰ পৰিস্থিতিৰ বুজ ল'বলৈ ঘটনাস্থলীত উপস্থিত হৈছে এইমছৰ সঞ্চালক প্ৰধান। জুইৰ বাবে হাহাকাৰ পৰিস্থিতিৰ সৃষ্টি হয়।
বহু প্ৰচেষ্টাৰ অন্তত এইমছৰ ভৱনত অগ্নিকাণ্ড নিয়ন্ত্ৰণাধীন হয়। জুই ইমানেই প্ৰচণ্ড আছিল যে জুইৰ ধোঁৱা ওপৰলৈ উঠি অহা দেখা যায়। সংবাদ মাধ্যমৰ খবৰ অনুসৰি জৰুৰীকালীন ৱাৰ্ডত সংঘটিত হোৱা জুই নিৰ্বাপন কৰা হৈছে। ৰোগীক ৱাৰ্ডৰ পৰা উলিয়াই অনা হয়। অৱশ্যে এই পৰ্যন্ত কোনো লোক হতাহতিৰ খবৰ পোৱা নাই।
অৱশ্যে অগ্নিকাণ্ডৰ কাৰণ এতিয়াও জানিব পৰা হোৱা নাই। এইমছ ভৱনৰ এটা কোঠাৰ পৰা ওলাই অহা ধোঁৱাই চিকিৎসালয় প্ৰশাসনৰ মাজত হাহাকাৰ সৃষ্টি কৰে।
Continue Reading
