ডিজিটেল ডেস্কঃ দিল্লী বিধানসভা নিৰ্বাচনত কংগ্ৰেছৰ সৈতে মিত্ৰতা আৰু নাথাকিব আম আদমী পাৰ্টিৰ। অৰবিন্দ কেজৰিৱালৰ দলে কয় যে ‘ইণ্ডিয়া’ কেৱল লোকসভা নিৰ্বাচনৰ প্ৰতি লক্ষ্য ৰাখিহে সৃষ্টি কৰা হৈছে। বিধানসভা নিৰ্বাচনত আপে পূৰ্ণ শক্তিৰে ৰাজধানীত যুঁজ দিয়াৰ সিদ্ধান্ত লৈছে।
বৃহস্পতিবাৰে কেজৰিৱালৰ ঘৰত আপৰ বিধায়ক আৰু শীৰ্ষ নেতাৰ এক বৈঠক অনুষ্ঠিত হয়। তাৰ পৰা ওলাই আহি মন্ত্ৰী গোপাল ৰায়ে সংবাদ মাধ্যমৰ আগত কয় যে তেওঁলোকে বিধানসভা নিৰ্বাচনত কংগ্ৰেছৰ সৈতে কোনো ধৰণৰ মিত্ৰতা কৰিব নিবিচাৰে। অকলে যুঁজিব বিচাৰে। তেওঁ কয়, ‘বিজেপি বিৰোধী মিত্ৰজোঁট ‘ইণ্ডিয়া’ লোকসভা নিৰ্বাচনত যুঁজিবলৈ গঠন কৰা হৈছিল। সেই মিত্ৰজোঁটৰ অংশীদাৰ হিচাপে বহু দলে একেলগে নিৰ্বাচনত প্ৰতিদ্বন্দ্বিতা কৰিছিল। আপো তাৰ এটা অংশ আছিল। কিন্তু এতিয়াৰ বাবে দিল্লী বিধানসভা নিৰ্বাচনত আপ কোনো মিত্ৰতাত নাই।’’
সম্প্ৰতি কাৰাগাৰত আছে আপৰ নেতা তথা দিল্লীৰ মুখ্যমন্ত্ৰী। লোকসভা নিৰ্বাচনত তেওঁলোকে ‘বিৰূপ’ পৰিস্থিতিত যুঁজিবলগীয়া হোৱা বুলি দাবী কৰে গোপালে। তেওঁ ক’লে, আমাৰ নেতা জেলত আছে। আমি এক কঠিন পৰিস্থিতিত পৰিছো। কেজৰীক গ্ৰেপ্তাৰ কৰাত ক্ষুব্ধ হৈ পৰিছে দলীয় কৰ্মী আৰু সমৰ্থক। কিন্তু ইয়াৰ পিছতো আমি একত্ৰিত হৈ থাকিলোঁ। দিল্লীত বিজেপিৰ প্ৰাৰ্থীৰ বিজয়ৰ ব্যৱধান যথেষ্ট হ্ৰাস পাইছে।
দিল্লীৰ লোকসভা নিৰ্বাচনত আপে ভাল ফলাফল দেখুৱাব পৰা নাছিল। কংগ্ৰেছৰ সৈতে মিত্ৰতাই কোনো সহায় কৰা নাছিল। ৰাজধানীৰ ৭খন আসনৰ আটাইকেইখন আসন দখল কৰিছে বিজেপিয়ে। তাত আপ-কংগ্ৰেছ মিত্ৰতা শূন্য। কেৱল দিল্লীতে নহয়, সমগ্ৰ দেশতে কেজৰিৰ দলে মাত্ৰ তিনিখন আসনহে পালে। তিনিওজনেই পঞ্জাৱৰ। এনে পৰিস্থিতিত তেওঁলোকে অকলে বিধানসভা নিৰ্বাচনত যুঁজ দিয়াৰ সিদ্ধান্ত লয়।
Continue Reading
