ডিজিটেল ডেস্কঃ কিছুদিন পূৰ্বে এটা সুৰংগৰ ভতৰত গাড়ী ৰখাই ধন লুট কৰাৰ ঘটনাৰ প্ৰতিক্ৰিয়া মাৰ নৌযাওঁতেই এইবাৰ পুনৰ দিল্লীত দুৰ্বৃত্তই গাড়ী ৰখাই ব্যৱসায়ীৰ পৰা ৭০ লাখ টকা লুটি নিয়াৰ ঘটনা ঘটিছে। প্ৰগতি ময়দান আৰক্ষী থানা এলেকাৰ পিছত এইবাৰ ঘটনাস্থলী হৈছে মঙ্গলপুৰী। লুণ্ঠনৰ ঘটনাটোৰ সমগ্ৰ দৃশ্য চিচিটিভিত ধৰা পৰিছে।
শনিবাৰে পুৱা এজন ব্যক্তিয়ে এখন গাড়ীৰে ব্যৱসায় সম্পৰ্কীয় কামত গৈ আছিল। আৰক্ষীয়ে ধাৰণা কৰা অনুসৰি দুৰ্বৃত্তৰ দলটোৰ এই বিষয়ত আগতীয়াকৈ তথ্য আছিল । গতিকে দুবৃত্তই ৰাস্তাত অপেক্ষা কৰি আছিল। আৰক্ষীয়ে জনোৱা অনুসৰি দুৰ্বৃত্তই মঙ্গলপুৰী আৰক্ষী থানা অঞ্চলৰ অন্তৰ্গত পুষ্পঞ্জলি এনক্লেভৰ সন্মুখত ব্যৱসায়ীজনৰ গাড়ী খন ৰখাই দিছিল।
তাৰ পিছত আগ্নেয়াস্ত্ৰ দেখুৱাই ব্যৱসায়ীজনৰ পৰা মোনা ভৰ্তি টকাখিনি লৈ গৈছিল।উল্লেখ্য এমাহৰ ভিতৰতে দিল্লীত ৰাস্তাত ধন লুটৰ এয়া দ্বিতীয়টো ঘটনা। দিল্লী আৰক্ষীৰ সূত্ৰই কৈছে যে অপৰাধীসকলক বিচাৰি উলিওৱাৰ বাবে চেষ্টা চলাই থকা হৈছে। অঞ্চলটোৰ চিচিটিভি ফুটেজ পৰীক্ষা কৰাৰ পিছত অপৰাধীসকলক চিনাক্ত কৰাৰ কাম চলি আছে। তেওঁলোকক সোনকালেই গ্ৰেপ্তাৰ কৰা হ'ব বুলি আৰক্ষীয়ে প্ৰকাশ কৰিছে। উল্লেখ্য ২৪ জুনত প্ৰগতি ময়দান আৰক্ষী থানা এলেকাৰ এটা ব্যস্ত সুৰংগত এজন ব্যৱসায়ীৰ গাড়ী ৰখাই ২ লাখ টকা লুটি নিয়া হৈছিল।
ঘটনাৰ দুদিন পিছত আৰক্ষীয়ে অপৰাধীসকলক গ্ৰেপ্তাৰ কৰিবলৈ সক্ষম হৈছিল। প্ৰগতি ময়দানত লুণ্ঠনৰ ঘটনাৰ চাৰি দিনৰ পিছত দুৰ্বৃত্তই দিল্লীৰ কাশ্মীৰ গেট অঞ্চলৰ এজন ব্যৱসায়ীৰ পৰা ৪ লাখ টকা লুটি নিছিল।
Continue Reading
