দলবদ্ধ ধৰ্ষণ, মৃত্যুৰ ভাবুকি, ষ্টুডিঅ’লৈ শৌচভৰ্তি বাকচ প্ৰেৰণ! কিয় আলাই-আথানি ছোনা মহাপাত্ৰৰ?

ডিজিটেল ডেস্ক : ‘ব’ল্ড এণ্ড বিউটিফুল’ ছোনা মহাপাত্ৰ তেওঁৰ সোণালী কণ্ঠৰ বাবে যিদৰে প্ৰখ্যাত ঠিক একেদৰে তেওঁ জনাজাত তেওঁৰ আপোচবিহীন কণ্ঠৰ বাবেও। বিভিন্ন সময়ত ভালেমান স্পৰ্শকাতৰ বিষয়তো আপোচবিহীনভাৱে কথা কোৱা ছোনাই পিছে সন্মুখীন হ’বলগীয়া হৈছে নানা অবাঞ্চিত পৰিস্থিতিৰ। বলীউডত তেওঁৰ মুখৰ পোনপটীয়াকৈ কোৱা তীক্ষ্ণ কথাই বহুতকে বিদ্ধ কৰিছে সময়ে সময়ে। তেওঁ আনকি অনু মালিকক মি টুৰ অভিযোগেৰে অভিযুক্ত কৰিছিল। তাৰ পাছতে বলীউডৰ সৈতে তেওঁৰ সম্পৰ্কৰ সূতাডাল অধিক শীৰ্ণ হৈ পৰিছে।

পিছে তাৰ পাছতো বলীউডৰ প্ৰসংগত তেওঁ মাত নমতাকৈ থকা নাই। বলীউডৰ ভাইজান ছলমানৰ বক্তব্যক লৈ হোৱা বিতৰ্কৰ প্ৰসংগত মাত মাতি ছোনা সন্মুখীন হৈছিল অবাঞ্চিত পৰিস্থিতিৰ। প্ৰিয়ংকা চোপ্ৰা সন্দৰ্ভত ছলমানে কৰা মন্তব্যৰ সৈতে একমত হ'ব নোৱৰা ছোনাই ছলমানৰ বিৰুদ্ধেও কৰিছিল তীক্ষ্ণ মন্তব্য। তাৰ পাছতে ছলমানৰ বিৰুদ্ধে কৰা মন্তব্যৰ বাবে তেওঁ মৃত্যুৰ ভাবুকি পাইছিল। কেৱল সেয়াই নহয়, গায়িকাগৰাকীয়ে আনকি দলবদ্ধ ধৰ্ষণৰ ভাবুকিও লাভ কৰিছিল। সোনাই অলপতে তেওঁৰ এই তিক্ত অভিজ্ঞতাৰ বিষয়ে কৈছিল।

অভিনেত্ৰী প্ৰিয়ংকা চোপ্ৰাৰ 'ভাৰত' ছবিখনৰ প্ৰস্তাৱ প্ৰত্যাখ্যান কৰাৰ পাছত ছলমানে ২০১৯ চনত কৈছিল যে, প্ৰিয়ংকাই গায়ক-অভিনেতা নিক জোনাছক বিয়া কৰাবলৈ 'তেওঁৰ কেৰিয়াৰৰ আটাইতকৈ ডাঙৰ ছবি'খন ত্যাগ কৰিছে। অভিনেতাজনে মন্তব্য কৰিছিল, "সাধাৰণতে মানুহে এনে সুযোগৰ বাবে নিজৰ স্বামীকো পৰিত্যাগ কৰে।" সেই সময়ত, ছোনাই ছলমানৰ মন্তব্যৰ তীব্ৰ বিৰোধিতা কৰিছিল।

আনহাতে ২০১৬ চনত, ছলমান খানৰ 'ছুলতান'ৰ শ্বুটিঙৰ সময়ত, ছলমানে মন্তব্য কৰিছিল যে তেওঁ এগৰাকী ধৰ্ষিতা মহিলাৰ দৰে অনুভৱ কৰিছে। কাৰণ চুলতানৰ শ্বুটিঙৰ সময়সূচী যথেষ্ট চাপপূৰ্ণ আছিল। সেয়েহে শ্বুটিঙৰ শেষত, অভিনেতাজনে এই বিতৰ্কিত মন্তব্য কৰিছিল। সেই সময়তো, ছোনাই তাৰ প্ৰতিবাদ কৰিছিল।

ছলমানৰ মন্তব্যৰ বিৰোধিতা কৰি ছোনাই কয়, "মহিলাক প্ৰহাৰ কৰা, মানুহক আক্ৰমণ কৰা, বন্যপ্ৰাণী হত্যা কৰাজন দেশৰ নায়ক। ছোনাৰ এই মন্তব্যক লৈ ভাইজানৰ অনুৰাগীসকল ক্ষুব্ধ হৈ পৰিছিল।

শেহতীয়াকৈ সংবাদ মাধ্যমৰ সৈতে হোৱা এটা সাক্ষাৎকাৰত ছোনা মহাপাত্ৰই কয়, "সেই সময়ত ভয়ংকৰ ট্ৰলিঙৰ সন্মুখীন হৈছিলোঁ। মৃত্যুৰ ভাবুকি আহিছিল আৰু কিছুমান লোকে ষ্টুডিঅ'লৈ শৌচভৰ্তি বাকচ প্ৰেৰণ কৰিছিল। যিহেতু মই ছলমানৰ মন্তব্যক সমালোচনা কৰিছিলোঁ, ই ভাইৰেল হৈ পৰিছিল।" তেওঁ কয় যে গোটেই বিষয়টোৰ পৰা বাহিৰ হ'বলৈ তেওঁক প্ৰায় দুমাহ সময় লাগিছিল।