দুবছৰত ক’ভিডতকৈ মৃত্যুৰ সংখ্যা বেছি পথদুৰ্ঘটনাত : ভয়ংকৰ তথ্য প্ৰকাশ সমীক্ষাত

ডিজিটেল ডেস্ক: গাড়ী চলাওঁতে সাৱধান হওক৷ নহ’লে আপুনিও সোমাই পৰিব পাৰে এনে তালিকাত৷ বিগত দুটা বৰ্ষত মহামাৰী ক’ভিডৰ কৱলত পৰি বহু লোকৰ মৃত্যু হৈছে৷ কিন্তু আশ্চৰ্যকৰ বিষয় যে, ক’ভিডতকৈ মৃত্যুৰ সংখ্যা সৰহ পথ দুৰ্ঘটনাতহে৷ উত্তৰ-প্ৰদেশৰ নয়ডাত চলোৱা এক সমীক্ষাৰ পাছতে চৰকাৰী তথ্যত প্ৰকাশ পায় এই ভয়ংকৰ তথ্য৷

ৰাজ্যখনৰ স্বাস্থ্য বিভাগে প্ৰকাশ কৰা তথ্য অনুসৰি গৌতম বুদ্ধ নগৰ জিলাৰ দুখন চহৰত বিগত দুটা বছৰত মৃত্যু ঘটিছিল ৪৬৮জন লোকৰ৷ ইয়াৰ বিপৰীতে জিলাখনত বিভিন্ন পথদুৰ্ঘটনাত ২০২০ বৰ্ষটোত ৩৮০ জন আৰু ২০২১ বৰ্ষত মৃত্যু ঘটে ৩২০জন লোকৰ৷ সৰ্বমুঠ দুটা বছৰতে ৭০০ লোকৰ মৃত্যু হয় দুৰ্ঘটনাত৷ অৱশ্যে এই সমীক্ষাত ডিচেম্বৰ মাহৰ তথ্য ধৰা হোৱা নাই৷

আনহাতে, সোমবাৰলৈকে গৌতম বুদ্ধ নগৰত ৫৬জন ক’ভিড ৰোগী চিকিৎসাধীন হৈ আছে৷ ২০২০ বৰ্ষৰ মাৰ্চ মাহত ধৰা পৰিছিল প্ৰথমজন ক’ভিড ৰোগী৷ আৰক্ষীয়ে জনোৱা মতে, বিগত দুটা বৰ্ষত ১,৪৪২টা পথদুৰ্ঘটনাৰ ঘটনা সংঘটিত হয় জিলাখনত৷ লগতে মুঠ ১,০৩২জন লোক আঘাতপ্ৰাপ্ত হোৱাৰ লগতে ২০২০ বৰ্ষত ৫২৮জন আৰু ২০২১ বৰ্ষত ৫০৪জন আহত হোৱা বুলি তথ্যত প্ৰকাশ পাইছে৷