দুই যুৱতীৰ দুৰ্দান্ত প্ৰেম! ৰিং চেৰেমনী হৈ গ'ল; বিয়া পাতিবলৈ সাজু সুৰভি আৰু পাৰমিতা

ডিজিটেল ডেস্কঃ দুই যুৱতীৰ মাজত দুৰ্ঘোৰ প্ৰেম। তেওঁলোকে এই সম্পৰ্কক দিব বিচাৰিছে বৈবাহিক ৰূপ। দুয়ো দুয়োকে আঙঠি পিন্ধাই এই সম্পৰ্কক আৰু অধিক শক্তিশালী কৰি তুলিলে। অতি সোনকালে দুই যুৱতী বিবাহপাশত আৱদ্ধ হ'ব। যুৱতী দুগৰাকীৰ নাম সুৰভি মিত্ৰ আৰু পাৰমিতা মুখাৰ্জী। সুৰভিৰ ঘৰ নাগপুৰত আৰু পাৰমিতাৰ ঘৰ কলকাতাত। সুৰভি পেছাত ডাক্তৰ আৰু পাৰমিতাই এটা ডাঙৰ কোম্পানীত চাকৰি কৰি আছে। নাগপুৰৰ এখন ৰিজ'ৰ্টত পৰিয়ালৰ লোকৰ উপস্থিতিত সুৰভি আৰু পাৰমিতাৰ ৰিং চেৰেমনী অনুষ্ঠিত হয়। সমকামিতাক বৰ্তমান সময়ত বৈধ বুলি ঘোষণা কৰা হ'ল যদিও এতিয়াও সমাজে ইয়াক সহজভাৱে গ্ৰহণ কৰিব পৰা হোৱা নাই।

সুৰভি মিত্ৰ আৰু পাৰমিতা সমাজক লৈ চিন্তিত নহয়। তেওঁলোকে নিজৰ জীৱন কেনেদৰে সুখী কৰিব পাৰি তাৰ ওপৰতহে গুৰুত্ব আৰোপ কৰিছে। পাৰমিতা মুখাৰ্জীয়ে কয় যে ''মই দেউতাৰ সৈতে বহুত ফ্ৰী আছিলো। তেওঁক মই সকলো কথা খুলি কওঁ। মই ২০১৩ চনতে দেউতাক মই যে লেছবিয়ান বা হমোছেক্সুৱেল সেই কথা জনাই দিছিলো। দেউতাই একো আপত্তি কৰা নাছিল। মাক অলপ পলমকৈ কৈছিলো। তেওঁ প্ৰথমে মানি লোৱা নাছিল কিন্তু বুজাই মেলি মান্তি কৰাব পাৰিলোঁ।'' আনহাতে সুৰভিয়ে কয় যে ''মই একদম খোলাখুলিকৈ মই কি বিচাৰো সেয়া মা-দেউতাক কৈছিলো। তেওঁলোকে একেবাৰতে মোৰ কথা মানি লৈছিল। তেওঁলোকক সকলো কথা খুলি কোৱা বাবে বহুত সুখী।''

দুই প্ৰেমিকাই লগতে কয়, ''আমি এটা কথা বিচাৰো ক'ব বিচাৰো যে সুখী হোৱাৰ অধিকাৰ সকলোৰে আছে। কোনে কেনেকৈ সুখী হ'ব সেয়া সকলোৰে নিজা নিজা কথা। আমি দুয়ো জীৱনসংগী হৈ আজীৱন থাকিব বিচাৰো।'' উল্লেখ্য যে সুৰভি মিত্ৰ আৰু পাৰমিতা মুখাৰ্জীয়ে এতিয়া সংসাৰ পাতনি মেলাৰ ৰঙীন সপোন ৰচনা কৰাত ব্যস্ত। বিয়াৰ পাছত তেওঁলোক ক'ত থাকিব। ঘৰটো কেনেকুৱা হ'ব। পৰিয়াল পৰিকল্পনা কেনেকৈ কৰিব আদি কথাৰ আলোচনাত ব্যস্ত আছে সুৰভি মিত্ৰ আৰু পাৰমিতা মুখাৰ্জী। দুয়োৰে জীৱন সুখৰ হ'বলৈ শুভকামনা আৰু আশীৰ্বাদ দিছে সুৰভি-পাৰমিতাৰ পৰিয়ালৰ লোকে।

আৰু পঢ়কঃ আকৌ বন্ধ জিম; মূৰে-কপালে হাত দিছে জিমৰ মালিকে, ক’লে ‘আমিও সুৰা বিকিব লাগিব’