উদ্বেগজনক হাৰত বৃদ্ধি ক'ভিড সংক্ৰমণ ! দিল্লী, মুম্বাইত এদিনতে দুগুণ বৃদ্ধি

ডিজিটেল ডেস্ক : ক'ভিডক লৈ অধিক সাৱধানতাৰ প্ৰয়োজনীয়তা আহি পৰিছে বৰ্তমান৷ শেহতীয়াকৈ ভাৰতত যোৱা ২৪ ঘণ্টাত ৯০,৯২৮ টা নতুন ক'ভিড সংক্ৰমণ ধৰা পৰিছে৷ যিটো সংখ্যা বুধবাৰৰ তুলনাত ৫৬.৫শতাংশৰো অধিক। ইয়াৰ পাছতে মুঠ ক'ভিডৰ সংখ্যা হৈছেগৈ ৩,৫১,০৯,২৮৬জন৷ লগতে, যোৱা ২৪ ঘণ্টাত দেশত ৩২৫জন লোকৰ মৃত্যু হোৱাৰ খবৰ পোৱা গৈছে আৰু ইয়াৰ ফলত মুঠ মৃত্যুৰ সংখ্যা ৫,৮২,৮৭৬ লৈ বৃদ্ধি হৈছে।

দিল্লী, মহাৰাষ্ট্ৰ, পশ্চিম বংগ, উত্তৰ প্ৰদেশ আৰু কেৰালাকে ধৰি কেইবাখনো ৰাজ্যত ক'ভিড-১৯ ৰ ঘটনা পুনৰ বৃদ্ধি পাইছে। বুধবাৰে ৰাজধানী দিল্লীত ক'ভিড-১৯ৰ ৰোগীৰ দৈনিক সংখ্যা প্ৰায় দুগুণ বৃদ্ধি হয়৷ বুধবাৰে ১০,৬৫৫জন ধৰা পৰে দিল্লীত৷ লগতে পজিটিভিটিৰ হাৰ ১১.৮৮ শতাংশলৈ বৃদ্ধি পাইছে আৰু ৮জনলোকৰ মৃত্যু হৈছে, যিটো প্ৰায় সাত মাহত সৰ্বাধিক বুলি জানিব পৰা গৈছে।

লগতে, মহাৰাষ্ট্ৰত বুধবাৰে ২৬,৫৩৮ টা নতুন ক'ভিডৰ ঘটনা ধৰা পৰে৷ যি এদিন আগৰ তুলনাত ৪৩.৭১ শতাংশ বা ৮,০৭২ টা ঘটনা বৃদ্ধি পাইছে৷ আনহাতে ৰাজ্যখনত আৰু ৮জন ৰোগী সংক্ৰমণত আক্ৰান্ত হৈ মৃত্যুবৰণ কৰিছে।

ইপিনে অসমতো উদ্বেগজনক হাৰত বৃদ্ধি কৰ’নাৰ সংক্ৰমণ৷ বুধবাৰে নতুনকৈ আক্ৰান্ত হয় ৫৯১ জন লোক৷ ইয়াৰে কামৰূপ মেট্ৰ’তে সৰ্বাধিক আক্ৰান্ত হৈছে ২৭৯ জন৷ বুধবাৰে মৃত্যু ঘটিছে ৪ গৰাকী কৰ’না ৰোগীৰ৷