ডিজিটেল ডেস্কঃ অংকিতা ভাণ্ডাৰীৰ হত্যাকাণ্ডই কঁপাইছে উত্তৰাখণ্ড। বেশ্যাবৃত্তিত নিয়োজিত নোহোৱা বাবেই হত্যাৰ বলি হ’ল অংকিতা ভাণ্ডাৰী। অংকিতাই উত্তৰাখণ্ডৰ ঋষিকেশ জিলাৰ বনন্তৰা ৰিজ’ৰ্টত ৰিচেপশ্যনিষ্ট হিচাপে কাম কৰি আছিল। নিৰুদ্দেশ হোৱা অংকিতা ভাণ্ডাৰীৰ হত্যাকাণ্ডৰ সৈতে জড়িত বিজেপিৰ প্ৰাক্তন ৰাজ্যিক মন্ত্ৰী বিনোদ আৰ্য্যৰ পুত্ৰ পুলকিত আৰ্য্যসহ তিনিজন লোকক আৰক্ষীয়ে গ্ৰেপ্তাৰ কৰিছে। ধৃত অভিযুক্তই তেওঁলোকৰ অপৰাধ স্বীকাৰ কৰিছে।
অভিযুক্তসকলে জনোৱা মতে, অংকিতাই ৰিজ’ৰ্টলৈ অহা গ্ৰাহকৰ ওচৰলৈ যাবলৈ অস্বীকাৰ কৰিছিল। ৰিচেপশ্যনিষ্ট অংকিতাক তেওঁলোকে দেহ ব্যৱসায়ত নমাবলৈ চেষ্টা কৰিছিল যদিও অংকিতাই সেই প্ৰস্তাৱ নাকচ কৰিছিল। সেয়ে তেওঁলোকে অংকিতাক হত্যা কৰি চিলা শক্তি খালত পেলাই দিছিল।
‘মই দুখীয়া হ’ব পাৰোঁ, কিন্তু ১০ হাজাৰ টকাত নিজকে বিক্ৰী কৰিব নোৱাৰো।’ অংকিতা ভাণ্ডাৰীয়ে ৰিজ’ৰ্টৰ অতিথিৰ সৈতে যৌন সম্পৰ্ক স্থাপন কৰিবৰ বাবে প্ৰস্তাৱ পাইছিল। সেই প্ৰস্তাৱৰ বিষয়ে এগৰাকী ঘনিষ্ঠ বন্ধুলৈ হোৱাটছএপ মেছেজত এনেদৰে লিখি জনাইছিল অংকিতাই। এই কথা তেওঁৰ এজন বন্ধুৱে দাবী কৰিছে।
১৯ বছৰীয়া অংকিতাৰ হত্যাকাণ্ডক লৈ উত্তৰাখণ্ডত উত্তেজনাময় পৰিৱেশৰ সৃষ্টি হৈছে। সমগ্ৰ দেশতে এই খবৰটোৱে চাঞ্চল্যৰ সৃষ্টি কৰিছে। অংকিতাৰ হত্যাকাণ্ডৰ অভিযোগৰ তদন্ত কৰি থকাৰ সময়তে আৰক্ষীয়ে লাভ কৰে চাঞ্চল্যকৰ তথ্য। পৌৰী জিলাৰ ৰিজ’ৰ্টখনত অতিথিসকলৰ সৈতে যৌন কাৰ্যত লিপ্ত হ’বলৈ জোৰ দিয়া হৈছিল অংকিতাক। অংকিতাৰ এগৰাকী ফেচবুক বন্ধুৱেও অভিযোগ কৰিছে যে সেই প্ৰস্তাৱত সন্মতি নিদিয়াৰ বাবেই তেওঁক হত্যা কৰা হৈছিল।
১৮ ছেপ্টেম্বৰত দুপৰীয়া ৰিজৰ্টত শেষবাৰৰ বাবে দেখা গৈছিল অংকিতাক। তেতিয়াৰ পৰা তেওঁ ৰহস্যজনকভাৱে নিৰুদ্দেশ হৈ পৰিল। আৰক্ষীৰ সূত্ৰ অনুসৰি সেইদিনা নিশা প্ৰায় ৮ বজাত অংকিতা বিজেপি নেতাৰ পুত্ৰ তথা ৰিজৰ্টৰ মালিক পুলকিত আৰ্য, ৰিজ’ৰ্ট মেনেজাৰ সৌৰভ ভাস্কৰ আৰু সহকাৰী প্ৰবন্ধক অংকিতৰ সৈতে হৃষিকেশলৈ গৈছিল। অংকিতাই তিনিওজন যুৱকৰ লগত কাজিয়া কৰিছিল। ৰিজ’ৰ্টত সংঘটিত হোৱা অপৰাধ ফাদিল কৰাৰ ভাবুকি দিয়ে অংকিতাই। ইয়াৰ পিছতে তেওঁক হত্যা কৰি চিলা শক্তি খালত পেলাই দিয়ে যুৱককেইজনে।
২১ ছেপ্টেম্বৰত অংকিতা সন্ধানহীন হোৱাৰ খবৰ থানাত দাখিল কৰা হৈছিল। FIR দাখিল কৰা হ’ল। ইয়াৰ কিছু সময়ৰ পাছতে হৰিদ্বাৰ বিজেপি নেতা বিনোদ আৰ্য্যৰ পুত্ৰ পুলকিত, তেওঁৰ বন্ধু সৌৰভ আৰু অংকিতক গ্ৰেপ্তাৰ কৰা হয়। তেওঁলোক আৰক্ষীৰ জিম্মাত আছে। শনিবাৰে খালটোৰ পৰা উদ্ধাৰ কৰে অংকিতাৰ মৃতদেহ। মৰণোত্তৰ পৰীক্ষাৰ প্ৰতিবেদনত দাবী কৰা হৈছে যে পানীত ডুব গৈ শ্বাসৰুদ্ধ হৈ মৃত্যু হয় অংকিতাৰ। মৃতদেহত আঘাত পোৱাৰ চিন দেখা গৈছিল।
শনিবাৰে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে অংকিতাৰ পিতৃৰ সৈতে টেলিফোনযোগে কথা পাতে। অংকিতাৰ পিতৃক সকলো সমৰ্থনৰ আশ্বাস দি মুখ্যমন্ত্ৰীয়ে কয় যে ছোৱালীজনীৰ হত্যাকাৰীক কঠোৰ শাস্তি প্ৰদান কৰা হ’ব।
Continue Reading
