দুখন দেশ: ভাৰত, আমেৰিকা- ৰাজনৈতিক সভ্যতাৰ নমুনা

ডিজিটেল ডেস্ক: আমেৰিকা যুক্তৰাষ্ট্ৰৰ ৰাষ্ট্ৰপতি জো বাইদেনে যোৱা মংগলবাৰে হোৱাইট হাউচত সাংবাদিকক সম্বোধন কৰিছিল৷ সেই অনুষ্ঠানতে এগৰাকী সাংবাদিকে আমেৰিকাত সংঘটিত ৪০ বছৰৰ ভিতৰত সৰ্বাধিক মুদ্ৰাস্ফীতি ৰাষ্ট্ৰপতি বাইদেনৰ ৰাজনৈতিক দায়বদ্ধতা হয় নে নহয় বুলি প্ৰশ্ন কৰিছিল৷ আৰু, সেই প্ৰশ্নতে ক্ৰোধিত হৈ পৰিছিল জো বাইদেন৷ বাইদেনে মুদ্ৰাস্ফীতি সন্দৰ্ভত প্ৰশ্ন কৰা সাংবাদিকগৰাকীক অশ্ৰাব্য ভাষাৰে গালি-গালাজ কৰে৷ ৰাষ্ট্ৰপতি বাইদেনৰ তেনে আচম্বিত প্ৰতিক্ৰিয়াই হতবাক কৰি তুলিলে উপস্থিত সাংবাদিকসকলক৷ আৰু, বাইদেনৰ সেই ভিডিঅ’টো বিয়পি পৰিল ছ’চিয়েল মিডিয়াত৷ পৰৱৰ্তী সময়ত জো বাইদেনৰ কটু মন্তব্যৰ বিৰুদ্ধে সমালোচনাৰ জোৱাৰ উঠিল আমেৰিকাত৷ আমেৰিকাৰ সাংবাদিকসকলেও জো বাইদেনক তেওঁৰ অশ্ৰাব্য মন্তব্যৰ বাবে সমালোচনাৰ লক্ষ্য কৰি লয়৷ আৰু, ভদ্ৰলোকৰ দৰে আচৰণ কৰি বাইদেনে তেওঁৰ মন্তব্যৰ বাবে ক্ষমা বিচাৰে৷ মহাশক্তিধৰ যুক্তৰাষ্ট্ৰখনৰ ৰাষ্ট্ৰনেতাগৰাকীয়ে ক্ষমা খোজা বিষয়টোৱে জো বাইদেনৰ ৰাজনৈতিক ব্যক্তিত্বৰ প্ৰতিফলন ঘটোৱা বুলি চৰ্চা চলিছে৷ জো বাইদেনৰ ক্ষমা খোজা বিষয়টোৱে চৰ্চা লাভ কৰি থকাৰ মাজতে ভাৰত তথা অসমৰ ৰাজনৈতিক নেতাসকলৰ প্ৰসংগও চৰ্চালৈ আহিছে৷ পৃথিৱীৰ ভিতৰতে মহাশক্তিধৰ ৰাষ্ট্ৰনেতাৰূপে পৰিচিত জো বাইদেনৰ মহানতাৰ বিপৰীতে ভাৰতৰ ক্ষেত্ৰত দেখা যায় এখন অন্য ছবি৷ ভাৰতৰ প্ৰধানমন্ত্ৰী নৰেন্দ্ৰ মোদীয়ে সাত বছৰত এখনো সংবাদমেল অনুস্থিত নকৰিলে৷ ভাৰতত শেহতীয়াকৈ চৰকাৰৰ ভুল-ত্ৰুটীক সমালোচনা কৰিলেই দেশ আৰু ৰাষ্ট্ৰৰ বিৰোধিতা কৰা হিচাপে প্ৰতিষ্ঠা কৰাৰ এক প্ৰয়াস পৰিলক্ষিত হয়৷ এনে এটি পৰিৱেশ নিৰ্মাণ কৰা হৈছে, য’ত বিৰোধীৰ কথাক গুৰুত্বহীন কৰি পেলোৱাৰ প্ৰৱণতাই গা কৰি উঠা দেখা গৈছে৷ বিৰোধীৰ কথা মানেই যেন ভুল, তেনে এটি ধাৰণা দিবলৈ শাসক পক্ষৰ ফালৰ পৰা চেষ্টা চলোৱা হয়৷ অসমতো অনুৰূপ ঘটনা৷ আমেৰিকা যুক্তৰাষ্ট্ৰৰ ৰাষ্ট্ৰপতিৰ বদান্যতাৰ বিপৰীতে ভাৰত তথা অসমৰ নেতাসকলৰ মাজত অহংকাৰ, আত্মভৰিতা আৰু এক ধৰণৰ ঔদাসীন্য পৰিলক্ষিত হয়৷ আমেৰিকাত ৰাষ্ট্ৰপতিয়ে সাংবাদিকক ক্ষমা খোজাৰ বিপৰীত ভাৰতত সাংবাদিকতাক চেপি খুন্দি ৰাজহাতোৰাত বন্দী কৰাৰ চেষ্টা অব্যাহত আছে৷ সামগ্ৰিকভাৱে, চাবলৈ গ’লে আমেৰিকাৰ ৰাষ্ট্ৰপতিৰ ক্ষমা খোজাৰ বদান্যতাই একেসময়তে অসম তথা ভাৰতৰ সাম্প্ৰতিক ৰাজনৈতিক পৰিস্থিতিটোকো উদঙাই তুলিলে৷ ৰাজনৈতিক সভ্যতা আৰু ব্যক্তিত্বসুলভ পৰিচয়েৰে জো বাইদেনে পুনৰবাৰ নিজকে বিকশাই তুলিলে নতুন ৰঙেৰে৷