ডিজিটেল ডেস্কঃ ২০২৪ৰ লোকসভা নিৰ্বাচনৰ ফলাফলত বিজেপি নেতৃত্বাধীন এনডিএই একক সংখ্যাগৰিষ্ঠতা লাভ কৰিব বুলি কেইবাটাও প্ৰতিষ্ঠানৰ এগজিট পলে প্ৰকাশ কৰিছে। কিন্তু এক্সিট পলৰ এনে দাবী মুঠেও মানি ল’ব খোজা নাই কংগ্ৰেছে। কংগ্ৰেছ নেত্ৰী ছোনিয়া গান্ধী আনকি ভোটগণনাৰ পূৰ্বৰ দিনটোতে হৈ আছে আশাবাদী। দুটা দশকৰ পূৰ্বে বেছিভাগ এগজিট প’লে ইংগিত দিছিল যে বিজেপিয়ে কেন্দ্ৰত পুনৰ ক্ষমতালৈ আহিব। কংগ্ৰেছৰ নাম গোন্ধই তেনে এগজিট পলত নাছিল। কিন্তু ফলাফলৰ পিছত দেখা গৈছিল যে ইউ পি এয়ে বিজেপি নেতৃত্বাধীন এন ডি এক বহু পিছ পেলাই থৈ গৈছে। সেই সময়ত এগজিট পলৰ দাবী ভুল প্ৰমাণিত কৰি ইউ পি এৰ চৰকাৰ হৈছিল। ২০ বছৰৰ মূৰত একে ঘটনাৰে পুনৰাবৃত্তি ঘটিব বুলি পৰম আশাবাদী কংগ্ৰেছ নেততৃত্ব। সেয়ে কিবা এটা যাদুকৰী ফলাফলৰ বাবে অপেক্ষা কৰি আছে কংগ্ৰেছে। আনকি ছোনিয়া গান্ধীয়েও মানি লোৱা নাই এইবাৰৰ এগজিট পল।
এইবাৰ পুনৰ কাৰ্যতঃ সকলো এগজিট প’লত বিজেপি নেতৃত্বাধীন এন ডি এৰ বৃহৎ জয়ৰ ভৱিষ্যদ্বাণী কৰা হৈছে। একাধিক এগজিট প’লত দাবী কৰা হৈছে যে এন ডি এৰ আসনৰ সংখ্যাই ৪০০ৰ ঘৰ অতিক্ৰম কৰিব পাৰে। কিন্তু ছোনিয়া গান্ধীয়ে সেইবোৰ মানি ল’বলৈ অস্বীকাৰ কৰিছে। এগজিট প’লৰ ফলাফল সন্দৰ্ভত সোধাত তেওঁ স্পষ্টকৈ কয় যে ‘এগজিট প’লত দেখুওৱা ফলাফল হুবহু বিপৰীত হ’ব বুলি আমি অতি আশাবাদী। ধৈৰ্য ধৰক , চাওক কি হয়।” উল্লেখ্য যেতিয়া বেছিভাগ এক্সিট প’লে ‘ইণ্ডিয়া শ্বাইনিং’ শ্ল’গানেৰে অটল বিহাৰী বাজপেয়ীৰ চৰকাৰে নিশ্চয়কৈ পুনৰ উভতি আহিব বুলি ইংগিত দিছিল, তেতিয়াও ছোনিয়া গান্ধী নিৰুৎসাহিত অথবা বিচলিত হোৱা নাছিল।
কংগ্ৰেছে অৱশ্যে ইতিমধ্যে এগজিট প’লৰ ফলাফলক অস্বীকাৰ কৰিছে। যেতিয়া ৰাহুল গান্ধীক এই বিষয়ে সোধা হৈছিল, তেতিয়া তেওঁ হাঁহি হাঁহি উত্তৰ দিছিল, "এয়া এগজিট প'ল নহয়, ই মোদী প'ল।" কংগ্ৰেছ নেতাগৰাকীৰ ভাষাত, "ইয়াক 'মোডী প'ল' বুলি কোৱা হয়, এগজিট প'ল নহয়। এয়া হৈছে 'মোদী মিডিয়া প'ল'। কল্পনাৰ আশ্ৰয়লৈ কৰা এক সমীক্ষা।”
কৰ্ণাটকৰ উপ-মুখ্যমন্ত্ৰী তথা ৰাজ্যিক কংগ্ৰেছৰ সভাপতি ডি কে শিৱকুমাৰে দাবী কৰা মতে, "ৰাজ্যখনৰ দুই তৃতীয়াংশ আসন কংগ্ৰেছে পাব।" ৰাজস্থান প্ৰদেশৰ কংগ্ৰেছৰ সভাপতি গোবিন্দ সিঙে দাবী কৰিছে যে কংগ্ৰেছে কমেও ১১-১২ খন আসনত জয়ী হোৱাটো নিশ্চিত। একেদৰে মহাৰাষ্ট্ৰৰ কংগ্ৰেছৰ ৰাজ্যিক সভাপতি নানা পাটোলে ইণ্ডিয়া মিত্ৰজোঁটে ৰাজ্যখনৰ ৩৮-৪০খন আসন লাভ কৰিব বুলি দাবী কৰিছে।
Continue Reading
