দুটা দশকৰ পাছতো অসমৰ বান সমস্যা ৰাষ্ট্ৰীয় সমস্যা নহয়: আছুৰ কেন্দ্ৰক কটাক্ষ

গুৱাহাটী: দুটা দশকৰো অধিক সময় পূৰ্বে কেন্দ্ৰীয় চৰকাৰে অসমৰ বাৰ্ষিক বান আৰু গৰাখহনীয়া সমস্যাসমূহক ৰাষ্ট্ৰীয় সমস্যা হিচাপে গণ্য কৰি সমাধানৰ প্ৰতিশ্ৰুতি দিছিল। কিন্তু এতিয়ালৈকে সেই প্ৰতিশ্ৰুতি কেৱল কাগজতে সীমাবদ্ধ হৈ আছে আৰু বাস্তৱত ইয়াৰ কোনো কাৰ্যকৰী পদক্ষেপ দেখা পোৱা নাই বুলি সৰ্ব্ব অসম ছাত্ৰ সন্থাই (আছু) অভিযোগ কৰিছে। ছাত্ৰ সংগঠনটোৱে কেন্দ্ৰীয় চৰকাৰৰ এই স্থিতিৰ তীব্ৰ সমালোচনা কৰিছে।

উল্লেখ্য যে, ২০০৫ চনৰ ৫ মে’ত তেতিয়াৰ প্ৰধানমন্ত্ৰী ড° মনমোহন সিঙে গুৱাহাটীত এক ত্ৰিপাক্ষিক বৈঠকৰ অধ্যক্ষতা কৰিছিল। অসম চুক্তি ৰূপায়ণৰ পৰ্যালোচনাৰ বাবে অনুষ্ঠিত এই গুৰুত্বপূৰ্ণ বৈঠকত কেন্দ্ৰীয় আৰু ৰাজ্য চৰকাৰৰ লগতে আছুৰ প্ৰতিনিধিসকলো উপস্থিত আছিল। সেই বৈঠকত ড° সিঙে অসমৰ বান আৰু গৰাখহনীয়া সমস্যাসমূহক ৰাষ্ট্ৰীয় সমস্যা হিচাপে গ্ৰহণ কৰি এক স্থায়ী সমাধানৰ ব্যৱস্থা কৰাৰ প্ৰতিশ্ৰুতি দিছিল। এই বিষয়ে চৰকাৰে বাতৰি কাকতত বিজ্ঞাপনো প্ৰকাশ কৰিছিল।

আছুৰ সভাপতি উৎপল শৰ্মাই এটা সংবাদ মাধ্যমৰ আগত এই সন্দৰ্ভত কয় যে, কেন্দ্ৰীয় চৰকাৰে প্ৰতিশ্ৰুতি অনুসৰি এই সমস্যাসমূহৰ স্থায়ী সমাধানৰ বাবে পদক্ষেপ ল’ব লাগিছিল, কিন্তু বাস্তৱত তেনে কোনো পদক্ষেপ পৰিলক্ষিত হোৱা নাই। তেওঁ লগতে কয় যে, কেন্দ্ৰই এই সমস্যাসমূহৰ ওপৰত বৈজ্ঞানিক গৱেষণা চলোৱাৰ লগতে পৰ্যাপ্ত পুঁজি যোগান ধৰিব লাগিছিল। ৰাজ্য চৰকাৰৰ একক প্ৰচেষ্টাৰে এই সমস্যা সমাধান কৰাটো সম্ভৱ নহয়, গতিকে কেন্দ্ৰই আগবাঢ়ি আহিব লাগিব। এই অঞ্চলৰ সকলো ৰাজ্যৰ সমন্বিত প্ৰচেষ্টাৰ জৰিয়তেহে এই সমস্যাৰ এক স্থায়ী সমাধান সম্ভৱ বুলি তেওঁ মত প্ৰকাশ কৰে।

আছুৱে জোৰ দি কৈছে যে, বান আৰু গৰাখহনীয়াৰ দৰে গুৰুত্বপূৰ্ণ বিষয়ত কেন্দ্ৰীয় চৰকাৰৰ নিৰ্লিপ্ততাই অসমৰ জনসাধাৰণক গভীৰভাৱে ক্ষতিগ্ৰস্ত কৰিছে। এই সমস্যাসমূহৰ লগত জড়িত জনসাধাৰণৰ জীৱন আৰু জীৱিকাৰ সুৰক্ষাৰ বাবে অতি শীঘ্ৰেই কেন্দ্ৰই কাৰ্যকৰী পদক্ষেপ লোৱাটো জৰুৰী বুলি সংগঠনটোৱে দাবী জনাইছে।