ডিজিটেল ডেস্ক: দুটাকৈ পাৰ্চেল বোমা বিস্ফোৰণে জোকাৰি গৈছে ম্যানমাৰৰ বিখ্যাত ইনছেইন কাৰাগাৰ। আজি পুৱা ইয়াঙ্গুনস্থিত ইনছেইন কাৰাগাৰৰ প্ৰৱেশদ্বাৰত সংঘটিত হয় এই বিস্ফোৰণ। বিস্ফোৰণত ৮ গৰাকী লোকে প্ৰাণ হেৰুওৱাৰ বিপৰীতে ১৮ গৰাকী লোক আঘাতপ্ৰাপ্ত হয়। নিহতসকলৰ ভিতৰত ৩ গৰাকী কাৰাগাৰৰ কৰ্মচাৰী আৰু ৫ গৰাকী দৰ্শনাৰ্থী আছিল বুলি কাৰাগাৰ কৰ্তৃপক্ষই জানিবলৈ দিয়ে।
উল্লেখ্য যে, ইনছেইন হৈছে ম্যানমাৰৰ সৰ্ববৃহৎ কাৰাগাৰ। এই কাৰাগাৰত প্ৰায় ১০ হাজাৰ কাৰাবন্দী আছে আৰু ইয়াৰে অধিকাংশই ৰাজনৈতিক বন্দী। এইপৰ্যন্ত কোনো ব্যক্তি বা গোটে বিস্ফোৰণৰ দায়িত্ব স্বীকাৰ কৰা নাই যদিও জুণ্টাই এই বিস্ফোৰণৰ আঁৰত সন্ত্ৰাসবাদী সংগঠন জড়িত আছে বুলি সন্দেহ কৰিছে।
কাৰাগাৰ কৰ্তৃপক্ষই উল্লেখ কৰা মতে কাৰাগাৰৰ পোষ্টৰুমত এই বিস্ফোৰণ সংঘটিত হৈছিল। বিস্ফোৰণস্থলীত প্লাষ্টিকত মেৰিয়াই থোৱা আন এটা বোমাও পোৱা গৈছে বুলি কৰ্তৃপক্ষই লগতে জানিবলৈ দিয়ে।
শতিকা পুৰণি কাৰাগাৰখনৰ বন্দীসকলৰ সৈতে কাৰাগাৰ কৰ্তৃপক্ষই অমানৱীয় আচৰণ কৰি আহিছে বুলি মানৱ অধিকাৰ গোটসমূহে অভিযোগ কৰি আহিছে।
Continue Reading
