ডিজিটেল ডেস্কঃ অতি দ্ৰুত হাৰত অৱনমন ঘটিছে মাৰ্কিন ডলাৰৰ তুলনাত ভাৰতীয় টকাৰ মূল্য। আমেৰিকা যুক্তৰাষ্ট্ৰৰ ফেডাৰেল বেংকৰ নীতিৰ পৰিৱৰ্তনৰ বাবে ভাৰতৰ মুদ্ৰাৰ মূল্য ডলাৰৰ হিচাপত হ্ৰাস হৈয়েই আছে। আজিও ভাৰতীয় টকাৰ মূল্য অভিলেখ হাৰত হ্ৰাস পাইছে। ডলাৰৰ মূল্য প্ৰথমবাৰৰ বাবে ৮৩ টকা অতিক্ৰম কৰে। আজিৰ দিনটোতএক ডলাৰৰ বিপৰীতে ভাৰতীয় টকাৰ মূল্য হৈছে ৮৩ টকা ৬ পইচা।
বৃহস্পতিবাৰে টকাৰ মূল্য পুনৰ ৬ পইচা হ্ৰাস পায়। আজি পুৱা টকাৰ মূল্য ৬ পইচা হ্ৰাস পোৱাত ডলাৰৰ তুলনাত টকাৰ মূল্য হৈছে ৮৩ টকা ৬ পইচা । কেৱল ডলাৰৰ বিপৰীতে টকাৰ মূল্য হ্ৰাস পোৱাই নহয়, আজি শ্বেয়াৰ বজাৰত মন্দাৱস্থাৰ ইঙ্গিতো পোৱা গৈছে।
আজি পুৱা শ্বেয়াৰ বজাৰ আৰম্ভ হোৱাৰ পিছত চেনচেক্স সূচক এটা ষ্ট্ৰোকত প্ৰায় ৩৫০ পইণ্ট হ্ৰাস পায়। নিফটি ৯০ পইণ্ট হ্ৰাস পায়। শ্বেয়াৰৰ বেছিভাগ আমেৰিকা যুক্তৰাষ্ট্ৰৰ বজাৰৰ তাৰতম্যৰ ওপৰত নিৰ্ভৰ কৰে।খাৰুৱা তেলৰ মূল্য নিৰন্তৰ বৃদ্ধি, বিশ্বব্যাপী বিত্তীয় মন্দাৱস্থাৰ আশংকা, বিদেশী বিনিয়োগৰ অভাৱ আদি। পৰিসংখ্যা অনুসৰি, কেৱল এই বছৰেই টকাৰ মূল্য ১০.৬ শতাংশ হ্ৰাস পাইছে।
যোৱা আঠ বছৰত এই হ্ৰাস ২৫ শতাংশতকৈও অধিক হৈছে। এনেদৰে ডলাৰৰ বিপৰীতে ভাৰতীয় টকাৰ মূল্য হ্ৰাস পাই গৈ থাকিলে ভাৰতীয় অৰ্থনীতি বাৰুকৈয়ে ক্ষতিগ্ৰস্ত হোৱাৰ আশংকা কৰিছে বিজ্ঞ মহলে। ইয়াৰ ফলত দেশত বিনিয়োগ হ্ৰাস পোৱাৰ লগতে মুদ্ৰাস্ফীতিও বৃদ্ধি পাব।
Continue Reading
