ডিজিটেল ডেস্কঃ দূৰ্দান্ত শতকেৰে উজলি উঠিল ভেংকটেশ আয়াৰ। দেওবাৰে মুম্বাই ইণ্ডিয়ানছৰ বিৰুদ্ধে কলকাতা নাইট ৰাইডাৰ্ছৰ বেটাৰগৰাকীয়ে শতক অৰ্জন কৰে। আইপিএলৰ ইতিহাসত কলকাতা নাইট ৰাইডাৰ্ছৰ যিকোনো বেটাৰৰ এইটো দ্বিতীয়টো শতক। ইয়াৰ পূৰ্বে ২০০৮ চনত আই পি এলৰ প্ৰথম বৰ্ষত কলকাতাৰ হৈ ব্ৰেণ্ডন মেককালামে শতক অৰ্জন কৰিছিল।
২০০৮ চনত আই পি এলৰ প্ৰথমখন মেচত ৰয়েল চেলেঞ্জাৰছ বেংগালুৰুৰ বিৰুদ্ধে কলকাতাৰ হৈ মেককালামে শতক কৰিছিল। সেই মেচখনত ১৫৮ ৰানৰ আগ্ৰাসী ইনিংছ আহিছিল নিউজিলেণ্ডৰ প্ৰাক্তন অধিনায়কগৰাকীৰ বেটৰ পৰা। তাৰ পিছত কলকাতাৰ হৈ আন কোনো বেটছমেনে শতক অৰ্জন কৰিব পৰা নাই। দেওবাৰে ১৫ বছৰৰ পাছত কলকাতাৰ হৈ দ্বিতীয় শতক অৰ্জন কৰে আয়াৰে
টি-২০ ক্ৰিকেটত এয়া আয়াৰৰ প্ৰথম শতক। মুম্বাইৰ বিৰুদ্ধে ৫১টা বলত ১০৪ ৰানৰ ইনিংছ খেলে তেওঁ। ৬টা চাৰি আৰু ৯টা ছয়েৰে ইনিংছটো সজায় তেওঁ।
যোৱা শুকুৰবাৰে ইডেনত কে কে আৰৰ বিৰুদ্ধে আই পি এলৰ প্ৰথম শতক অৰ্জন কৰে ছানৰাইজাৰ্ছ হায়দৰাবাদৰ হেৰী ব্ৰুকে। কলকাতাৰ মেচত ভেংকটেশৰ বেটৰ পৰাই এইবাৰৰ প্রতিযোগিতাৰ দ্বিতীয় শতক আহে।
ভেংকটেশৰ বৰ্তমান ফৰ্ম ভাল। মুম্বাইৰ বিৰুদ্ধে খেলাৰ পাছত আই পি এলত সৰ্বাধিক ৰান সংগ্ৰহকাৰী হিচাপে বিবেচিত হৈছে তেওঁ। তেওঁৰ মুঠ ৰান হৈছেগৈ ২৩৪ ৰান।
Continue Reading
