ডিজিটেল ডেস্কঃবিশ্বৰ অন্যতম ব্যস্ত জলপথ ছুৱেজ খালত ট্ৰেফিক জামৰ ফলত পুনৰ ব্যাহত হৈ পৰিছে পৰিবহন। খালটোৰ মাজভাগতে আৱদ্ধ হৈ পৰিছে এখন বিশাল মালবাহী জাহাজ।২৫০ মিটাৰ দীঘল এফিনিটি ভি নামৰ টেংকাৰ খনে চৌদি আৰৱলৈ যাত্ৰা আৰম্ভ কৰাৰ পিছতে ছুৱেজ খালত হঠাতে আবদ্ধ হৈ পৰে। ছুৱেজ খালৰ দক্ষিণ অংশৰ সেই ঠাই খিনিতে পূৰ্বে এভাৰ গিভন কণ্টেইনাৰ জাহাজ খন আবদ্ধ হৈ পৰিছিল।
ফলত বহু দিনলৈ ছুৱেজ খালেৰে জাহাজৰ যাতায়াত বন্ধ আছিল। ২০২১ চনৰ মাৰ্চ মাহত এক সপ্তাহৰ বাবে ছুৱেজ খালেৰে জাহাজৰ চলাচল বন্ধ হৈ পৰাত বিশ্বৰ বাণিজ্যত ব্যাপক প্ৰভাৱ পৰিছিল। ফলত জাহাজ খনৰ মালিকসকলে বাধ্য হৈ চুৱেজ খাল কৰ্তৃপক্ষক ২০০ মিলিয়ন ডলাৰৰ অধিক ক্ষতিপূৰণ পৰিশোধ কৰিবলগীয়া হৈছিল।
এইবাৰ আকৌ আন এখন জাহাজ আবদ্ধ হৈ পৰাত ছুৱেজ খাল কৰ্তৃপক্ষই যুদ্ধকালীন তৎপৰতাৰে জাহাজ খন মুকলি কৰাৰ পদক্ষেপ গ্ৰহণ কৰে। বহু ঘণ্টা ধৰি চলোৱা প্ৰচেষ্টাৰ ফলত ছুৱেজ খালটো পুনৰ মুকলি কৰিব পৰা গৈছে বুলি জানিব পৰা গৈছে।
চুৱেজ খাল কৰ্তৃপক্ষৰ এজন মুখপাত্ৰ জৰ্জ চাফৱাটে ইজিপ্ত চৰকাৰৰ এক্সট্ৰা নিউজ চেনেলক কয় যে বুধবাৰে স্থানীয় সময় অনুসৰি সন্ধিয়া প্ৰায় ৭.১৫ বজাত এফিনিটি নামৰ জাহাজ খন আবদ্ধ হৈ পৰিছিল যদিও এতিয়া খালটো পুনৰ মুকলি কৰিব পৰা গৈছে।উল্লেখ্য বিশ্ব বাণিজ্যৰ প্ৰায় ১২ শতাংশ ছুৱেজ খালৰ মাজেৰেই হয় । এই খালে এছিয়া আৰু ইউৰোপৰ মাজত দ্ৰুততম বাণিজ্যিক পথ মুকলি কৰিছে।
২০২১ বৰ্ষত এভাৰ গিভন কণ্টেইনাৰ জাহাজ খন ৪০০মিটাৰ দীঘল আৰু ৫৯ মিটাৰ উচ্চতাৰ মালবাহী জাহাজখন ছুৱেজ খালত আব্ধ হৈ পৰিছিল।
জাহাখনে চীনৰ পৰা মালবাহী কন্টেইনাৰ লৈ নেদাৰলেণ্ডৰ ৰোটাৰডাম বন্ধৰলৈ গৈ আছিল।
ইয়াৰ মাজতে নিয়ন্ত্ৰণ হেৰুৱাই জাহাখন ঘূৰিবলৈ আৰম্ভ কৰিছিল। অৱশেষত জাহাজখনৰ দুইটা মূৰ ছুৱেজ খালৰ দুটা পাৰে লাগি ধৰে।ফলত জাহাজখন ছুৱেজ খালত আৱদ্ধ হৈ পৰে।
অতি ব্যস্ত জলপথটোত এইদৰে জাহাজখন আৱদ্ধ হৈ পৰাত বহু দিনলৈ জলপথটো বন্ধ হৈ আছিল।
Continue Reading
