এচিড আক্ৰমণকাৰী প্ৰাক্তন প্ৰেমিকৰ সৈতে বিয়া হ’ল ভুক্তভোগী প্ৰেমিকা

ডিজিটেল ডেস্ক: প্ৰেমৰ অনুভূতি কিমান গভীৰ হ’লে এগৰাকী আহত প্ৰেমিকাই পুনৰ আকোৱালি ল’ব পাৰে আক্ৰমণকাৰী প্ৰেমিকক৷ প্ৰেম প্ৰত্যাখ্যান, প্ৰেম বিচ্ছেদ আদিয়ে কিমান ভয়াৱহতাৰ ৰূপ ল’ব সেয়া বৰ্তমান সময়ত কল্পনাও কৰিব নোৱাৰি৷ এই প্ৰেমৰ বাবেই চিৰদিনলৈ ঘূণীয়াও হৈছে বহু যুৱতী৷ আক্ৰমণ হৈছে এচিড আক্ৰমণৰ৷ কিন্তু তু্ৰ্কীৰ এগৰাকী এচিড আক্ৰমণৰ বলি হোৱা যুৱতীয়ে প্ৰাক্তন প্ৰেমিকৰ সৈতে বিবাহপাশত আবদ্ধ হোৱাৰ পাছতে এক চৰ্চাৰ কেন্দ্ৰবিন্দু হৈ পৰিছে৷

বেৰফিন অ’যেক নামৰ যুৱতীগৰাকী ২০১৯ চনত তেওঁৰ প্ৰাক্তন প্ৰেমিক কাছিম অ’জান চেলটিকৰ সৈতে প্ৰেম বিচ্ছেদ হৈছিল৷ তাৰ পাছতে কাছিমে প্ৰেমিকা বেৰফিনৰ ওপৰত এচিড আক্ৰমণ কৰিছিল৷ এই আক্ৰমণৰ পাছতে বেৰফিনৰ মুখমণ্ডল সম্পূৰ্ণ জ্বলি গৈছিল৷ কেৱল সিমানেই নহয়, বেৰফিনে এচিড আক্ৰমণৰ পাছৰে পৰা সোঁফালৰ চকুৰে সম্পূৰ্ণ নেদেখা হৈ যোৱাৰ লগতে আনটো চকুৰেও ভালকৈ নেদেখা হৈ পৰিছিল৷ বিচ্ছেদৰ সিদ্ধান্ত লোৱাৰ পাছৰে পৰাই এই আক্ৰমণৰ বলি হৈ এক জটিল অস্ত্ৰোপচাৰৰ পাছত বেৰফিনে সেই আক্ৰমণকাৰী প্ৰাক্তন প্ৰেমিক কাছিমৰ সৈতে অলপতে বিবাহপাশত আবদ্ধ হয়৷

উল্লেখ্য যে, এই ঘটনাৰ পাছতে প্ৰেমিকাৰ পৰিয়ালে দিয়া এজাহাৰৰ ভিত্তিত কাছিম ২০২০ চনৰ জানুৱাৰী মাহত গ্ৰেপ্তাৰ হোৱাৰ লগতে যাৱজ্জীৱন কাৰাদণ্ডৰে দণ্ডিত হৈছিল৷ ইয়াৰ পাছতে বেৰফিনে ২০২০ চনৰে এপ্ৰিল মাহত এই অভিযোগ উঠাই লয় আৰু কাছিমক ভালপাওঁ বুলি ব্যক্ত কৰে৷ লগতে বেৰফিনে কাছিমক বিয়া কৰাৰো ইচ্ছা প্ৰকাশৰ কথা জানিবলৈ দিয়ে৷

যুৱতীগৰাকীৰ এই সিদ্ধান্তৰ পাছতে তেঁওৰ পিতৃয়ে ছ’চিয়েল মিডিয়াৰ যোগে যুৱতীগৰাকীৰ সৈতে কোনো সম্পৰ্ক নাই বুলি মত প্ৰকাশ কৰে৷ তেওঁ কয়, “তাইৰ কাৰণে মই যিমান সম্ভৱ সকলো কামেই কৰিছিলো৷ কিন্তু ইয়াৰ পাছত মই আৰু তাইৰ সৈতে নাই৷ তাই কেৱল আমাৰা পৰিয়ালটোকেই নহয়, তাইক ভালপোৱা সকলো মানুহক অপমান কৰিলে৷ বেৰফিন নামৰ আমাৰ কোনো কন্যা নাই৷”