তালিবানৰ আগ্ৰাসনত পলায়ন কৰা ৰাষ্ট্ৰনেতাসকল এতিয়া ক’ত?

ডিজিটেল ডেস্কঃ এখন ৰাষ্টলৈ কিমান কাল অমানিশা আহিব পাৰে! সন্ত্ৰাসবাদীৰ কাল সন্ত্ৰাসৰ পৰা ক্ষন্তেকৰ বাবে পৰিত্ৰাণ পোৱা ৰাষ্ট্ৰখনলৈ পুনৰ বিভীষিকা নামি অহা ৰাষ্ট্ৰখনৰ কথাকে ক’বলৈ লৈছো৷ হয়, আফগানিস্তানত তালিবানৰ ক্ষমতালৈ অহাৰ পাছত পুনৰ জেহাদী চৰিত্ৰ লৈছে৷ তালিবানে আফগান মহিলাৰ ওপৰত জাৰি কৰিছে ইটোৰ-পাছত সিটো নিষেধাজ্ঞ৷

তালিবানে মহিলাৰ ওপৰত শেহতীয়াকৈ জাৰি কৰা নিষেধাজ্ঞ অনুসৰি মহিলাসকলে পুৰুষ- আত্মীয় অবিহনে দূৰলৈ যাত্ৰা কৰিব নোৱাৰে, অৰ্থাৎ আফগান মহিলাই অকলে ৭২ কিলোমিটাৰৰ অধিক পথ অকলে ভ্ৰমণ কৰিব নোৱাৰিব৷ তদুপৰি যিসকল মহিলাই হিজাব পৰিধান নকৰে, তেওঁলোককো গাড়ীত ভ্ৰমণ কৰিব দিয়া নহ’ব৷ ইয়াৰ পূৰ্বে তালিবানে মহিলাসকলক ধাৰাবাহিক ছবিত অভিনয় কৰাতো বাধা দিছিল৷

তালিবানে আফগানিস্তান নিজৰ দখললৈ অনাৰ পাছত আফগানিস্তানৰ বহুটো ৰাষ্ট্ৰ নেতাই দেশ ত্যাগ কৰিছিল, বৰ্তমান তেওঁলোক ক’ত আছে সেয়া বহুতৰ বাবে ৰহস্যৰ মাজত! আফগান ৰাষ্ট্ৰপতি আশ্ৰফ ঘানিয়ে তালিবানৰ আক্ৰমণত দেশখনৰ পৰা পলায়ন কৰিছিল৷ ঘানিৰ সন্ধান এতিয়ালৈ অনিশ্চিত হৈ আছে যদিও অভ্যন্তৰীণ মন্ত্ৰালয়ৰ এজন জ্যেষ্ঠ বিষয়াই কোৱা মতে তেওঁ তাজিকিস্তানলৈ ৰাওনা হৈছে, বৈদেশিক মন্ত্ৰালয়ৰ এজন বিষয়াই কৈছিল যে তেওঁৰ অৱস্থান এতিয়াও অজ্ঞাত আৰু তালিবানে ৰাষ্ট্ৰপতি গৰাকীৰ সন্ধানত আছে। কিছুমান স্থানীয় সামাজিক মাধ্যম ব্যৱহাৰকাৰীয়ে ৰাষ্ট্ৰ নেতাজন এনেদৰে সন্ধানহীন হৈ থকা কথাটোক ‘কাপুৰুষ’ বুলি অভিহিত কৰিছিল।