ডিজিটেল ডেস্কঃ কেতিয়াবা কিছুমান চমৎকাৰ ঘটনা ঘটে যিবোৰ ঘটনাই মানুহৰ মাজত ঈশ্বৰ বিশ্বাস আৰু অধিক দৃঢ় কৰে। ওড়িশাৰ গোপীনাথপুৰৰ গোপীনাথ মন্দিৰৰ পৰা ভগৱান কৃষ্ণৰ অলংকাৰ চুৰি কৰা এজন চোৰে ৯ বছৰৰ পাছত অলংকাৰখিনি ঘূৰাই দিবলৈ বাধ্য হয়। চোৰজনে মন্দিৰত অলংকাৰখিনি ঘূৰাই দিয়াৰ লগতে এখন চিঠিও লিখি থৈ যায়।
মন্দিৰত চুৰি কৰাৰ পাছৰে পৰা চোৰজনে দুঃস্বপ্ন দেখি থকা বুলি চিঠিখনত উল্লেখ কৰিছে। ইয়াৰ লগতে তেওঁ লিখিছে যে গীতা ভাগৱত পঢ়াৰ পাছত তেওঁ নিজৰ ভুল উপলব্ধি কৰিব পাৰিছে। এই অলংকাৰসমূহ কৃষ্ণ আৰু ৰাধা মূৰ্তিৰ আছিল, যাৰ মূল্য লক্ষাধিক টকাৰ।
চোৰজনে লিখিছে ২০১৪ চনত তেওঁ এই অলংকাৰবোৰ চুৰ কৰিছিল, যাৰবাবে তেওঁ এই ৯ বছৰত বহু সমস্যাৰ সন্মুখীন হ’বলগীয়া হৈছিল। তেওঁ সকলো অলংকাৰ ঘূৰাই দিয়াৰ লগতে প্ৰায়শ্চিত্ত হিচাপে অতিৰিক্ত ৩০০ টকাও এৰি থৈ গৈছিল। অচিনাক্ত চোৰজনে এই সকলোবোৰ কথা তেওঁৰ ক্ষমাপ্ৰাৰ্থনা পত্ৰত উল্লেখ কৰিছিল।
চোৰজনে স্বীকাৰ কৰে যে ভাগৱতত থকা ভগৱান শ্ৰীকৃষ্ণৰ শিক্ষাই তেওঁক অভিভূত কৰে। সেয়ে তেওঁ চুৰি হোৱা গহনাবোৰ মন্দিৰত ঘূৰাই দিয়াৰ সিদ্ধান্ত লয়। চুৰি হোৱা গহনাবোৰ ঘূৰাই পোৱাৰ বাবে মন্দিৰৰ পূজাৰী-ভক্তসকলৰ মাজত আনন্দৰ জোৱাৰ উঠে। ভক্তসকলৰ মতে চোৰজনে কৰা অনুতাপ আৰু ভগৱান শ্ৰীকৃষ্ণৰ গুৰুত্বৰ বিষয়ে তেওঁ কৰা উপলব্ধি ভাগৱত শক্তিৰে এটা উদাহৰণ।
Continue Reading
