এগৰাকী অসমীয়া লেখকলৈ আন্তঃৰাষ্ট্ৰীয় সন্মান

ডিজিটেল ডেস্ক: অসমত স্ত্ৰীশিক্ষাৰ বাটকটীয়া, স্বাধীনতা সংগ্ৰামী চন্দ্ৰপ্ৰভা শইকীয়ানীৰ জীৱন আধাৰিত এখন গ্ৰন্থই লাভ কৰিছে আন্তঃৰাষ্ট্ৰীয় সন্মান৷ হিৰণ্য বৰা ৰচিত ‘চন্দ্ৰপ্ৰভা, দ্য আইৰণ লেডী অব্ আছাম’ শীৰ্ষক গ্ৰন্থখনে সৰ্বাধিক বিক্ৰীৰ অভিলেখ স্পৰ্শ কৰাৰ বাবে ব্লুৰ’জ বেষ্টচেলাৰ- ২০২১ বঁটা লাভ কৰিছে৷ গ্ৰন্থখনৰ প্ৰকাশক ব্লু ৰ’জ এক আন্তৰ্জাতিক পৰ্যায়ৰ প্ৰকাশক সংস্থা আৰু ব্লু ৰ’জ প্ৰকাশিত বৰাৰ গ্ৰন্থখন প্ৰায় সকলো ইউৰোপীয় দেশ আৰু আমেৰিকা যুক্তৰাষ্ট্ৰত উপলব্ধ।

প্ৰকাশকে লেখক বৰালৈ দিয়া এক পত্ৰত লিখিছে এনেদৰে, “আমি নিশ্চিত যে, আপুনি সন্তুষ্ট আৰু গৌৰৱান্বিত অনুভৱ কৰিছে। আমিও আপোনাৰ দৰে এজন লেখকক আমাৰ সৈতে পাই আনন্দিত আৰু একেধৰণে আপোনাৰ সৈতে কাম কৰিবলৈ বাট চাই আছোঁ। আমি আপোনাৰ ভৱিষ্যতৰ প্ৰচেষ্টাৰ বাবে আপোনাক শুভকামনা জনাইছো আৰু আপোনাৰ সফলতাৰ আৰু বহুতো কাহিনী শুনিবলৈ আশা কৰোঁ। এই বঁটাটো আপোনাৰ গৌৰৱময় কেৰিয়াৰৰ আৰম্ভণি। ভাল কাম অব্যাহত ৰাখিব!’’

উল্লেখযোগ্য যে, এই গ্ৰন্থখনৰ প্ৰথমটো কপী এই বৰ্ষৰ ১৬ মাৰ্চত ভাৰতৰ প্ৰধানমন্ত্ৰীক অৰ্পণ কৰা হৈছিল৷ প্ৰধানমন্ত্ৰীয়ে হিৰণ্য বৰাৰ ‘চন্দ্ৰপ্ৰভা- দ্য আয়ৰণ লেডী অব্ আছাম’ নামৰ গ্ৰন্থখনৰ প্ৰতিলিপি লাভ কৰি আনন্দিত হৈছিল। গ্ৰন্থখনত চন্দ্ৰপ্ৰভা শইকীয়ানীৰ জীৱনগাথাক লিখা হৈছে, যিগৰাকী মহীয়সীয়ে অসমৰ প্ৰগতি, সামাজিক সংস্কাৰ আৰু মহিলাৰ সৱলীকৰণৰ দিশত উল্লেখনীয় অৱদান আগবঢ়াইছিল।