ভাৰতত বিধ্বস্ত সংবাদ মাধ্যমৰ স্বাধীনতা: মানি নলয় অনুৰাগ ঠাকুৰে

ডিজিটেল ডেস্ক: সংবাদ স্বাধীনতা সূচকাংকত বিশ্বৰ প্ৰেক্ষাপটত ভাৰতে লাভ কৰা স্থানৰ সৈতে একমত নহয় কেন্দ্ৰীয় চৰকাৰ৷ ‘ৰিপ’ৰ্টাৰ্ছ উইডাউট বৰ্ডাৰ’ৰ দ্বাৰা প্ৰকাশিত ‘ৱৰ্ল্ড প্ৰেছ ফ্ৰীডম ইণ্ডেক্স’ত ভাৰতে ১৮০খন দেশৰ ভিতৰত ১৪২সংখ্যক স্থান লাভ কৰিছে৷ এই পৰিসংখ্যাক লৈ এতিয়া সন্তুষ্ট নহয় কেন্দ্ৰীয় চৰকাৰ৷ দেশৰ তথ্য আৰু সম্প্ৰচাৰ মন্ত্ৰণালয়ে মঙলবাৰে লোকসভাত কয় যে কেন্দ্ৰই বিভিন্ন কাৰণত ভাৰতত সংবাদ মাধ্যমৰ স্বাধীনতা সম্পৰ্কে ‘ৰিপ'ৰ্টাৰ্ছ উইডাউট বৰ্ডাৰ’ৰ দ্বাৰা উত্থাপিত সিদ্ধান্তত সন্মত নহয়৷

এই বছৰ ৰিপ’ৰ্টাৰ্ছ উইডাউট বৰ্ডাৰৰ দ্বাৰা সংকলিত আৰু প্ৰকাশিত বিশ্ব প্ৰেছ স্বাধীনতা সূচকত ১৮০খন দেশৰ ভিতৰত ভাৰতক ১৪২ নম্বৰত স্থান দিয়া সন্দৰ্ভত এক প্ৰশ্নৰ লিখিত উত্তৰত তথ্য আৰু সম্প্ৰচাৰ মন্ত্ৰী অনুৰাগ ঠাকুৰে কয় যে, প্ৰতিবেদনখনৰ প্ৰকাশকে পদ্ধতিটো গ্ৰহণ কৰাটো সন্দেহজনক আৰু অস্বচ্ছ।

তেওঁ লগতে কয় যে, ৱৰ্ল্ড প্ৰেছ ফ্ৰীডম ইণ্ডেক্স এটা বিদেশী বেচৰকাৰী সংগঠন ৰিপ'ৰ্টাৰ্ছ উইডাউট বৰ্ডাৰে প্ৰকাশ কৰিছে। চৰকাৰে ইয়াৰ দৃষ্টিভংগী আৰু দেশৰ ৰেংকিঙত ‘গ্ৰাহক’ নহয়। বিভিন্ন কাৰণত এই সংগঠনটোৱে লোৱা সিদ্ধান্তৰ সৈতে কেন্দ্ৰ সন্মত নহয়৷ ঠাকুৰে উল্লেখ কৰে যে সংস্থাটোৰ সমীক্ষাত কম নমুনা সংগ্ৰহ কৰিছে, যাৰ গণতন্ত্ৰৰ মৌলিক বিষয়বোৰৰ প্ৰতি সামান্য বা কোনো গুৰুত্ব নাই৷ প্ৰক্ৰিয়াটো সন্দেহজনক আৰু অস্বচ্ছ হোৱাৰ উপৰি সংবাদ মাধ্যমৰ স্বাধীনতাৰ স্পষ্ট সংজ্ঞাৰ অভাৱ, তেওঁ কয়।

উল্লেখযোগ্য যে, ৰিপ’ৰ্টাৰ্ছ উইডাউট বৰ্ডাৰৰ মতে, সাংবাদিকতাৰ বাবে ‘বেয়া’ বুলি গণ্য কৰা দেশবোৰৰ অধীনত ভাৰতক তালিকাভুক্ত কৰা হৈছে আৰু সাংবাদিকসকলৰ বাবে বিশ্বৰ আটাইতকৈ বিপদজনক স্থানবোৰৰ ভিতৰত অন্যতম। ভাৰতৰ চুবুৰীয়া দেশসমূহৰ ভিতৰত নেপালৰ স্থান ১০৬, শ্ৰীলংকা ১২৭ আৰু ম্যানমাৰ, সামৰিক অভ্যুত্থানৰ পূৰ্বে ১৪০ নম্বৰত আছে। অৱশ্যে, পাকিস্তান আৰু বাংলাদেশে সূচকত ক্ৰমান্বয়ে ১৪৫ আৰু ১৫২ সংখ্যক স্থান লাভ কৰিছে।

মন্ত্ৰীগৰাকীয়ে দৃঢ়তাৰে কয় যে, ভাৰতৰ সংবিধানৰ ১৯ নং অনুচ্ছেদৰ অধীনত সন্নিবিষ্ট বাক স্বাধীনতা আৰু মত প্ৰকাশৰ অধিকাৰ নিশ্চিত কৰিবলৈ চৰকাৰ প্ৰতিশ্ৰুতিবদ্ধ। সাংবাদিকৰ সুৰক্ষা আৰু স্বাধীনতা সন্দৰ্ভত প্ৰশ্নৰ উত্তৰ দি ত্ৰিপুৰা আৰক্ষীয়ে শেহতীয়াকৈ বেআইনী কাৰ্য-কলাপ (প্ৰতিৰোধ) আইনৰ অধীনত সংবাদ মাধ্যমৰ লোকসহ ১০২ জন লোকৰ বিৰুদ্ধে গোচৰ ৰুজু কৰাৰ ঘটনা সংক্ৰান্তত উত্তৰ দি তেওঁ কয় যে, ভাৰতৰ সংবিধানৰ সপ্তম অনুসূচীৰ অধীনত অপৰাধ চিনাক্তকৰণ, পঞ্জীয়ন আৰু অনুসন্ধান আৰু অপৰাধীসকলক তেওঁলোকৰ আইন প্ৰৱৰ্তনকাৰী সংস্থাৰ জৰিয়তে মোকৰ্দমা কৰাৰ বাবে ৰাজ্য চৰকাৰ দায়বদ্ধ৷ কেন্দ্ৰীয় চৰকাৰে সাংবাদিককে ধৰি দেশৰ প্ৰতিজন নাগৰিকৰ সুৰক্ষা আৰু নিৰাপত্তাক সৰ্বাধিক গুৰুত্ব দিয়ে বুলি ঠাকুৰে মন্তব্য কৰে৷

সদনত অনুৰাগ ঠাকুৰৰ এই মন্তব্যৰ বিপৰীতে দেশত সংবাদ মাধ্যমৰ স্বাধীনতা হেৰোৱা বুলি সৰ্বত্ৰ চৰ্চিত হৈছে৷ আনকি, উচ্চতম ন্যায়ালয়ৰ মুখ্য ন্যায়াধীশ এন ভি ৰামানায়ো ভাৰতৰ সংবাদ ক্ষেত্ৰই মৌলিকতা হেৰুওৱা বুলি উদ্বেগ প্ৰকাশ কৰিছিল৷ বৰ্তমান দেখা গৈছে যে ৰাজনৈতিক হস্তক্ষেপে ভাৰতৰ সংবাদজগতক প্ৰভাৱিত কৰিছে৷ আনকি, চৰকাৰৰ ভুল নীতিক সমালোচনা কৰাৰ বাবে ‘আনন্দবাজাৰ পত্ৰিকা’ৰ দৰে সংবাদ প্ৰতিষ্ঠানলৈ চৰকাৰী বিজ্ঞাপন বন্ধ কৰি দিয়া হৈছে৷ এনে পৰিপ্ৰেক্ষিতত সংবাদ স্বাধীনতাৰ ক্ষেত্ৰখনত বিশ্বৰ প্ৰেক্ষাপটত ভাৰতৰ স্থান নিম্ন হোৱা বিষয়টো দেশজুৰি চৰ্চিত হৈছে৷