এহাতে ভাৰতৰ বজাৰত গাড়ীৰ বিক্ৰী হ্ৰাস: আনহাতে, গাড়ীৰ সৰঞ্জামত ১৮% জিএছটি আৰোপৰ প্ৰস্তুতি

ডিজিটেল ডেস্ক: ভাৰতৰ বজাৰত বিক্ৰী হ্ৰাস হৈছে গাড়ীৰ৷ যোৱা ডিচেম্বৰ মাহত ভাৰতৰ বজাৰত গাড়ীৰ বিক্ৰীৰ হাৰ ১৩ শতাংশ হ্ৰাস পাইছে৷ জানিব পৰা মতে, বিশ্বৰ বজাৰত ছেমিকণ্ডাক্টৰৰ নাটনিৰ ফলত উদ্ভৱ হোৱা পৰিস্থিতিৰ বাবেই ভাৰতত গাড়ীৰ বিক্ৰী হ্ৰাস হোৱা বুলি ধাৰণা কৰা হৈছে৷ দেশৰ আগশাৰীৰ গাড়ী নিৰ্মাতা প্ৰতিষ্ঠানসমূহে বিগত ডিচেম্বৰ মাহত গ্ৰাহকৰ চাহিদা অনুসৰি গাড়ী যোগান ধৰিব নোৱাৰিলে৷ আনহাতে, গাড়ী বিক্ৰীৰ হাৰ হ্ৰাস পোৱাৰ বিপৰীতে গাড়ী নিৰ্মাতা প্ৰতিষ্ঠানসমূহে বৃদ্ধি কৰি গৈছে গাড়ীৰ দাম৷ চলিত বিত্তীয় বৰ্ষত তৃতীয়বাৰৰ বাবে মাৰুতি ছুজুকীয়ে গাড়ীৰ দাম বৃদ্ধি কৰিছে৷ নিৰ্মাণ ব্যয় বৃদ্ধি হোৱা বাবেই গাড়ীৰ দাম বৃদ্ধি কৰা বুলি প্ৰতিষ্ঠানটোৱে সদৰি কৰিছে৷ ইপিনে, গাড়ীৰ সৰঞ্জাম নিৰ্মাতা প্ৰতিষ্ঠান এছ’চিয়েচন চমুকৈ একমাই চৰকাৰক গাড়ীৰ সৰঞ্জামত জিএছটিৰ হাৰ ১৩ শতাংশকৈ আৰোপ কৰিবলৈ আহ্বান জনাইছে৷ সংগঠনটোৰ মতে, গাড়ীৰ সৰঞ্জামত ১৮ শতাংশকৈ সমান হাৰত জিএছটি আৰোপ কৰিলে দেশত ক্ৰমবৰ্ধমান নকল সৰঞ্জামত নাকী লগাব পাৰিব বুলি একমাৰ অধ্যক্ষ সঞ্জয় কুমাৰে সদৰি কৰিছে৷ গাড়ীৰ বিক্ৰী হ্ৰাস হোৱাৰ প্ৰভাৱ অসমৰ গাড়ী ব্যৱসায়তো পৰিছে৷ দেখা গৈছে, অসমতো অসমীয়া ব্যৱসায়ীৰ গাড়ীৰ শ্ব’ৰূম বন্ধ হৈ পৰিছে৷ দেশজুৰি হোৱা অৰ্থনৈতিক বিপৰ্যয়ৰ প্ৰভাৱ পৰিছে অসমতো৷ তাৰেই প্ৰতিফলন অসমত বন্ধ হৈ পৰা গাড়ীৰ ব্যৱসায়৷ অসমৰ এইসকল প্ৰথম প্ৰজন্মৰ অসমীয়া ব্যৱসায়ী৷ এওঁলোকৰ ব্যৱসায় এনেদৰে বন্ধ হৈ পৰাতো অসমৰ ব্যৱসায়িক ক্ষেত্ৰ তথা সামগ্ৰিকভাৱে দেশৰ অৰ্থনীতিৰ বাবে গভীৰ উদ্বেগৰ বিষয়৷