এই পদক কেৱল মোৰ নহয়ঃ অলিম্পিকত পদক লাভ কৰা প্ৰথমগৰাকী ভাৰতীয় মহিলা শ্বুটাৰ মনু ভাকেৰৰ মন্তব্য

২০২০ চনৰ টকিঅ’ অলিম্পিকৰ সময়তো   মনু ভাকেৰকলৈ বহুতে  আশা কৰিছিল। কিন্তু প্ৰতিভাৱান শ্বুটাগৰাকীয়ে সেইবেলি খালী হাতেৰে উভতি আহিবলগীয়া হৈছিল।কিন্তু সেই বিফলতাই মনুক বহু কথা শিকাইছিল। সেইবাবেই পেৰিছ অলিম্পিক ২০২৪ত  ১০ মিটাৰ এয়াৰ পিষ্টল ইভেণ্টত ব্ৰঞ্জৰ পদক লাভেৰে তেওঁ সকলোৰে আশা পূৰণ কৰিলে। এক সাক্ষাৎকাৰত মনুৱে  কয়, ‘মই বিশ্বাস কৰোঁ যে জয় বা সফলতাই জীৱনত যিমানখিনি শিকাব নোৱাৰে, সিমানখিনি আমি বিফলতাৰ পৰা শিকিব পাৰো। টকিঅ’ৰ পৰা যিখিনি শিকিছো তাকে লৈ মই আগবাঢ়িছো।" লগতে তেওঁ কয় যে কঠিন সময়ত বহু লোক তেওঁৰ কাষত আছিল। আজি অলিম্পিকত পদক লাভ কৰি ইতিহাস ৰচনা কৰি তেওঁলোককো ধন্যবাদ জনাব বিচাৰিছে মনুয়ে। কিন্তু যিহেতু এয়া প্ৰথম অলিম্পিক পদক, গতিকে মনুৱে কয় যে এই ব্ৰঞ্জৰ পদক তেওঁৰ বাবে অতি বিশেষ।

ব্ৰঞ্জৰ পদক জয় কৰাৰ পিছত মনুয়ে  জীৱনত গীতাৰ অৱদানৰ বিষয়ে কয়। যুৱ শ্বুটাৰগৰাকীৰ  মতে, “মোৰ এজন গুৰু আছে। তেওঁ মোক প্ৰতিদিনে শুই উঠাৰ সময়ত ধ্যান কৰিবলৈ কয়। আৰু প্ৰতিদিনে মোক গীতাৰ পৰা দুটা শ্লোক আবৃত্তি কৰিবলৈ কয়। তাৰ পৰাই মই অনুভৱ কৰিলোঁ যে গীতা ইমান পুৰণি গ্ৰন্থ হ’লেও আজিও ই অতি প্ৰাসংগিক।” অলিম্পিকৰ ব্ৰঞ্জৰ পদক বিজয়ী শ্বুটাৰগৰাকীৰ মতে গীতাই তেওঁক  ইতিবাচক মানসিকতা আৰু কঠোৰ পৰিশ্ৰমেৰে আগবাঢ়ি যাবলৈ শিকাইছে। অনাগত দিনত তেওঁ এই মন্ত্ৰ অনুসৰণ কৰি যাব।