ডিজিটেল ডেস্কঃ গৰুক খুন্দা মৰাৰ ঘটনা প্ৰায়ে সংঘটিত হোৱা বন্দে ভাৰত এক্সপ্ৰেছৰ এটা দবাত এইবাৰ জুই লাগিল। ৰে’লখনে সোমবাৰে ভূপালৰ পৰা দিল্লীলৈ গৈ থকাৰ সময়তে এই অঘটন সংঘটিত হয়। ৰে’লখনৰ এটা দবাত জুই লগাৰ পিছতে যাত্ৰীৰ মাজত আতংক বিয়পি পৰে।
অগ্নিনিৰ্বাপক বাহিনীয়ে ঘটনাস্থলীলৈ গৈ যাত্ৰীসকলক সুৰক্ষিতভাৱে উলিয়াই অনাৰ ব্যৱস্থা কৰে। এই ঘটনাত কোনো লোক হতাহত হোৱাৰ কোনো খবৰ পোৱা হোৱা নাই। ঘটনাটো সোমবাৰে মধ্য প্ৰদেশৰ কুৰৱাই কেথোৰা অঞ্চলত সংঘটিত হৈছে।
ৰে'লৱে সূত্ৰৰ মতে, বেটাৰী বাকচত প্ৰথমে জুই দেখা গৈছিল। জুই লগাৰ পিছত ৰে'লৱেই এক বিবৃতিত কয় যে বন্দে ভাৰত এক্সপ্ৰেছৰ তলৰ বেটাৰী বাকচ এটাত জুই লাগিছিল। অগ্নি নিৰ্বাপক বাহিনীৰ কৰ্মচাৰী ঘটনাস্থলী ত উপস্থিত হৈ জুই নিৰ্বাপন কৰিবলৈ সক্ষম হয়। । বেটাৰী বাকচটোত কেনেকৈ জুই লাগিল তাকে লৈ বিভ্ৰান্তিৰ সৃষ্টি হৈছে। ঘটনা সন্দৰ্ভত তদন্ত ঘোষণা কৰা হৈছে।
Continue Reading
